PROFILPELAJAR.COM

	Kaiserslautern
	urbo
	Rigardo el la urbodomo
	Blazono
	Blazono
	Oficiala nomo: Kaiserslautern
Lando	Germanio
Federacia lando	Rejnlando-Palatinato
Situo	Kaiserslautern
- alteco	251 m s. m.
- koordinatoj	49° 26′ 41″ N 7° 46′ 8″ O / 49.44472 °N, 7.76889 °O (mapo)
Areo	139,72 km² (13 972 ha)
Loĝantaro	101 228 (fine de decembro 2022)
Denseco	724,51 loĝ./km²
urbestro	Klaus Weichel (SPD)
Horzono	MET (UTC+1)
- somera tempo	MEST (UTC+2)
Poŝtkodo	67655/67663
Tel. antaŭkodo	+49 (0)63
	Situo de la urbo enkadre de Germanio Situo de la urbo enkadre de Germanio
	Vikimedia Komunejo: Kaiserslautern
	Retpaĝo: www.kaiserslautern.de

Koordinatoj: 49° 26′ 41″ N 7° 46′ 8″ O / 49.44472 °N, 7.76889 °O (mapo)

Kaiserslautern estas germana industria kaj universitata urbo je la nord-okcidenta rando de la palatinata arbaro, en la suda parto de la federacia lando Rejnlando-Palatinato.

Ĝi havas statuson de eksterdistrikta urbo kaj estas sidejo de la samnoma distrikto. La urbo konatas interalie pro sia futbala klubo 1 FC Kaiserslautern kaj estas unu de la eventourboj de la Futbala Mondpokalo 2006.

Fine de 2022-12-31 Kaiserslautern havis 101228 loĝantojn, kaj sekve kune kun la same granda komunumo Trier estas la kvara plej granda urbo de Rejnlando-Palatinato (post Mainz, Ludwigshafen kaj Koblenz).

La plej proksimaj pli grandaj urboj estas Ludwigshafen, ĉirkaŭ 70 kilometrojn oriente, Mainz ĉirkaŭ 80 kilometrojn nord-oriente kaj Saarbrücken ĉirkaŭ 70 kilometrojn okcidente.

Situo

Kaiserslautern situas 233 metrojn super marnivelo je la nord-okcidenta rando de la palatinata arbaro, en vasta valo kun nomo "bovlo de Kaiserslautern". Dum norde (Rothenberg), oriente kaj sude (Humberg, Kahlenberg) etendiĝas arbaraj montetoj, okcidente de la urbo komenciĝas marĉa (kaj do sen-monta) regiono. La rivereto Lauter trafluas la urbon, en la tuta urbocentro tamen subtere.

Historio

Dum la tridekjara milito Kajzerslaŭterno estis preskaŭ detruita. En 1635, la urbon sieĝis la 7000-opa soldataro de la Katolika Ligo, konsistanta plejparte el Kroataj mercenarioj. La 17an de julio, ili sukcesis trabori la fortikaĵon, kaj post ebriiĝo per la lokaj vinrezervoj, ili buĉis 1500 homojn el la tiama 3200-a loĝantaro, kaj forbrulis parton de la urbo. La ceteraj loĝantoj fuĝis, plejparte al apuda vilaĝeto, kie ili estis post nelonge malkovritaj kaj grandparte neniigitaj. Post ĉi-tiu epizodo, konata kiel la "kroata sturmo", la urbo bezonis proksimume 150 jarojn por reatingi sian tiaman loĝantaronombron.

Dum la francia revolucio en la batalo de Kaiserslautern de la 28a ĝis la 30a de novembro 1793 la armeo de Karl-Wilhelm von Braunschweig venkis la armeon de Lazare Hoche.

Ekde la 19-a jarcento gravis la firmao Pfaff kiu konstruis ĉefe kudrajn maŝinojn. Por ĝiaj laboristoj malfermiĝis en 1924 la banejo Pfaffbad.

Najbararaj komunumoj

Otterbach, Otterberg, Mehlingen, Elmstein, Enkenbach-Alsenborn, Fischbach, Hochspeyer, Waldleiningen, Elmstein, Trippstadt, Stelzenberg, Schopp, Krickenbach, Queidersbach, Bann, Kindsbach, Landstuhl, Ramstein-Miesenbach, Weilerbach, Rodenbach (Pfalz), Katzweiler

Gefiloj

Friedrich Pfister, klasika filologo kaj arĥeologo

Urbaj partnerecoj

La urbo Kaiserslautern havas tutan faskon da ĝemelurboj. La unua urba partnereco jam ekestis dum 1960.

Davenport (Iovao), Usono, ekde 1960
Douzy, Francio, ekde 1967
Saint-Quentin, Francio, ekde 1967
Newham, Granda Londono, Britio, ekde 1974
Bunkyo-ku, Japanio, ekde 1988
Brandenburg an der Havel de la federacia lando Brandenburgio, ekde 1988
Pleven, Bulgario, ekde 1999
Columbia (Suda Karolino), Usono, ekde 2000
Silkeborg, Danio, ekde 2000
Guimarães, Portugalio, ekde 2000
Banjaluko, Bosnio kaj Hercegovino, ekde 2003
Bitola, Makedonio
Igualada, Hispanio
Rotherham, Britio

Kulturo

La Palatinata Teatro montras operojn, operetojn, muzikalojn, baledojn, klasikan kaj modernan teatron.

Je kinejoj ekzistas la kinocentro UCI Kinowelt, la Central Filmpalast kaj programo-kinejon kun la nomo Union-Kino.

En la eventohalo Fruchthalle okazas sociaj eventoj kaj koncertoj, en la kultura centro Kammgarn rok-, ĵaz- bluz- kaj pop-muzikaj koncertoj, kabaredo kaj kompareblaj eventoj. La iom pli eta Jugend- und Programmzentrum ofertas kabaredon kaj muzikon.

La gastejo Step's am alten Westbahnhof estas restoracio por iom-pli-aĝuloj, kie ĉiuvespere ludas muzikaj grupoj kaj foje okazas ĵazaj aŭ latinamerikaj muzikonoktoj. Kaj ankaŭ en la irlanda bierejo Irish House ofte muzikas (kelt-muzikaj) grupoj.

Muzeoj kaj bibliotekoj

La arta galerio Pfalzgalerie montras ĉefe pentraĵojn de la 19a kaj 20a jarcentoj. En la muzeoj Wadgasserhof kaj Theodor-Zink-Museum oni peras urban kaj regionan historion. Bibliotekoj estas la Stadtbibliothek por ĉiu civitano, la universitataj bibliotekoj Universitätsbibliothek, Hochschulbibliothek, kaj Bibliothek der Fachhochschule, sed krome ankaŭ speciala regiona scienca biblioteko de la regiona organizo Bezirksverband Pfalz kun la nomo Palatinata biblioteko.

Germanlingve eblas serĉi tra la havaĵoj de ĉiuj tiuj bibliotekoj en la reta katalogo de publikaj bibliotekoj de Rejnlando-Palatinato.

Regulaj eventoj

Dum la majo de ĉiu jaro okazas la tiel nomata kermeso Maikerwe. Dum junio sekvas studenta somera festo en la universitato kaj dum julio la malnovurba festo. Septembre okazas muzikaj eventoj en la tuta urbo, sub la nomo Barbarossafest "Swinging Lautern". La aŭtuna kermeso nomiĝas Oktoberkerwe, kaj dum novembro kaj decembro sekvas antaŭkristnaska bazaro.

Esperanto

En la urbo ekzistas aktiva Esperanto-grupo, kiu kunvenas dufoje po monato. Je pentekosto 2010, la 87-a Germana Esperanto-Kongreso okazis en la urbo. En iom norda urbocentra kvartalo estas strato nomata "Esperantostraße".

Futbala Mondpokalo 2006

Inter la 9-a de junio kaj la 9-a je julio 2006 en Germanio okazis la Futbala Mondpokalo, interalie en Kaiserslautern. En la en 2005 tute trakonstruita stadiono, kiu dum la turniro havis 48 500 sidlokojn, okazis pluraj matĉoj.