Estante filo de tanzaniaj diplomatoj li naskiĝis en Bonn. Kiam li estis etinfano, la sepkapa familio transloĝiĝis al Daresalamo; la familio revenis al Germanio en 1979, kiam li estis naŭjara. Sed nur kelkajn monatojn pli malfrue la gepatroj devis ekdeĵori en Reĝlando Svedio. Por ebligi al la du plej aĝaj filoj bonan edukadon, ili estis sendataj al katolika gimnazio en Neunkirchen-Seelscheid. Tie Chialo trapasis la abiturientan ekzamenon.[1]
Unue li trejniĝis labori ĉe ilar-fara frezmaŝino.[2] Poste li studis en Erlangen historion, politikon kaj ekonomiajn ŝtatsciencojn; anstataŭ finstudo li iĝis eksstudanto kaj dediĉis sin al muziko.[3][4]
En 1991 Chialo iĝis kantanta membro de la du jarojn antaŭe fondita nurenberga bando Blue Manner Haze. La du albumoj Another Confused Youth Production (1991) kaj Blue Manner Haze (1995) iel fiaskis; samjare la trupo neniiĝis.[5][6] La spertoj tamen estis gravaj por konatiĝi kun kulturuloj. En 2009 Chialo fondis la markon Airforce1 Records kaj naŭ jarojn poste Afroforce1 kiel ero de Universal Music.[7] Celo estis la antaŭenigo de muziko afrika. Tiel Airforce1 Records[8] gastigas artistojn kiel Santiano, la aktoron Matthias Schweighöfer, The Kelly Family, Ben Zucker, Sarah Zucker kaj la dancmuzik-diskĵokeon Noel Holler.[9]
Okaze de la Eŭrovido-Kantokonkurso 2019 Joe Chialo apartenis al la germana ĵurio.[10] Lia en 2022 aperinta membiografio Der Kampf geht weiter titoliĝas laŭ la lastaj vortoj kiujn la patro de Chialo diris en la sola restanta telefona alvoko.[11]
Chialo estas edziĝinta havante filinon. Li estas romkatolika.[12]
En 2016 li ekpartianis ĉe la kristandemokratoj kaj kandidatis en 2021 kiel rekta propositulo por la Bundestag-balotdistrikto en Berlin-Spandau/Charlottenburg Nord.[14] Tutgermanlande li konatiĝis kiam Armin Laschet, kanceliera kandidato prezentis lin kiel membron de sia teamo respondecantan pri arto kaj kulturo.[15] Finfine Chialo ne iĝis ano de Bundestag. En januaro 2022 Chialo estis elektita en la federacian partiestraron de CDU.[16] En la 27.4.2023 Chialo iĝis senatoro berlina.
En januaro 2024 Chialo deklaris ke publika, financa helpo estonte nur estos donata post konfeso de malŝato de antisemitismo fare de la helppetantoj.[17] En la 12.9.2024 li estis atakita en Berlino fare de kontraŭisraelaj manifestaciantoj, kiam li volis ekparoli okaze de reinaŭguro de la Centro pri arto kaj urbanizado.[18]
Verkoj
Der Kampf geht weiter: Mein Leben zwischen zwei Welten (la lukto pludaŭras: mia vivo inter du mondoj), eldonejo Murmann, Hamburg 2022, ISBN 978-3-86774-744-8.
