Foi fundáu en 1980, sol patrociniu de la empresa d'aluminiu Reynolds. En 1989 pasó a ser patrocináu pol bancu español Banesto, que dexó de patrocinar l'equipu a finales de 2003, tomando'l relevu'l gobiernu de les Illes Balears. En 2005 entra como copatrocinador el bancu francésCaisse d'Epargne, que pa la temporada 2006, quedó como únicu patrocinador. A partir de 2011, el patrocinador principal pasa a ser la compañía telefónica Movistar.
L'equipu profesional nació nel añu 1980 col patrociniu de la empresa navarra d'aluminios INASA (Industria Navarra del Aluminiu, S.A.), que dende 1974 patrocinara un equipu xuvenil y dende 1977 un conxuntu aficionáu, esti baxu la direición de José Miguel Echavarri, alma mater de la escuadra profesional. El so principal xefe de files foi Perico Delgado, gracies al cual llográronse los mayores ésitos coles sos victories nel Tour de 1988 y la Vuelta de 1989. Otros de los sos corredores más destacaos, tantu poles sos victories como pola so trayeutoria, fueron Ángel Arroyo, José Luis Laguía y Julián Gorospe.
Banesto (1990-2003)
En 1989 entró nel patrociniu'l Bancu Banesto copatrocinando al equipu dende'l Tour de Francia d'esi añu, que finalmente se quedó con tol equipu en 1990 pasando la sede del equipu a Madrid. El camín d'esti equipu siempres va tar amestáu a Miguel Indurain, colos cinco tours consecutivos que ganó ente 1991 y 1995 y los dos xiros en 1992 y 1993.
Los años 1992 y 1993 consiguió ser el meyor equipu nel ranking UCI.
Tres la retirada de Indurain al rematar la temporada de 1996, Abraham Olano y el "Chava" Jiménez fueron los principales estandartes del equipu, consiguiendo como mayor ésitu la Vuelta de 1998, na que fueron 1º y 3º respeutivamente.
En 2005 entró como copatrocinador la empresa francesa Caisse d'Epargne, qu'a partir del añu 2006 adquier una mayor importancia y en 2007 quédase como únicu patrocinador del equipu tres l'arrenunciu del Gobiernu de les Islles Baleares.
Caisse d'Epargne
2006
L'añu 2006 concluyó en 2ª posición la clasificación por equipos del UCI ProTour con 350 puntos, tres la escuadra danesa Team CSC. El so corredor meyor asitiáu foi Alejandro Valverde que ganó'l Maillot Blanco con un total de 285 puntos sacando 72 puntos al 2º clasificáu.
Xabier Zandio, colos colores del equipu cuando esti denominábase Caisse d'Epargne.
L'añu 2007 concluyó en 3ᵉʳ posición la clasificación por equipos del UCI ProTour con 337 puntos. El so corredor meyor asitiáu foi Alejandro Valverde que concluyó 4º con 190 puntos.
Na temporada 2008 venció na clasificación por equipos del UCI ProTour con 229 puntos. El so corredor meyor asitiáu foi Alejandro Valverde que tamién s'axudicó la victoria con 123 puntos.
Once años dempués del trunfu de Olano, l'equipu consigue de nuevu la victoria final na Vuelta a España de la mano d'Alejandro Valverde y conclúi la temporada como segunda meyor escuadra del pelotón mundial.
Amás, llógrense 24 victories en total, con trunfos finales en rondes per etapes de la talla de Dauphiné Libéré, París-Niza y Volta a Catalunya.
En xineru, la empresa Caisse d'Epargne anunció que nun anovaría'l so patrociniu del equipu (que expiraba a final de temporada), polo que los responsables de la escuadra teníen d'atopar unu nuevu pa garantizar la continuidá de la formación nel pelotón pa les siguientes temporaes.[3]
La temporada tuvo coles mesmes marcada pola sentencia del TAS sobre'l Casu Valverde, qu'ordenó una sanción de dos años a Alejandro Valverde al considerase probada la so implicación como vecera de la rede de dopaxe liderada por Eufemiano Fuentes afayada na Operación Puerto, no que suponía una llombarada a la investigación del CONI. Valverde foi amás descalificáu de toles carreres nes que participara dende'l 1 de xineru d'esi añu, siendo por tantu anulaos los sos puestos d'honor y victories, que fueron reasignados pola UCI.
David Arroyo foi segundu nel Giro d'Italia, xubiendo asina al segundu caxón del podiu final del anfiteatru de Verona xunto a Ivan Basso y Vincenzo Nibali, primeru y terceru respeutivamente y dambos del Liquigas-Doimo. Arroyo tuvo una destacada actuación y lideró mientres cinco díes la clasificación xeneral, portando asina la maglia rosa hasta que foi superáu por Basso na antepenúltima etapa (última xornada de monte), con meta en Aprica.
L'equipu nun llogró faese con una victoria d'etapa nel Tour de Francia, a pesar de los diversos intentos protagonizaos por homes como Luis León Sánchez o Christophe Moreau. La escuadra terminó segunda na clasificación por equipos (a 9'15" del ganador, el RadioShack) que llegó a liderar mientres dellos díes, ente que na xeneral individual nun pudo meter a nengún corredor ente los diez primeros y Moreau remató segundu na clasificación del monte por detrás del so compatriota Anthony Charteau.
Pablo Lastras llogró la victoria na 3ᵉʳ etapa de la Vuelta Ciclista a España, con llegada na llocalidá de Totana (Murcia), consiguiendo'l maillot coloráu de líder de la xeneral, según el blancu de la combinada y el blancu azul del monte, portándolos mientres una xornada.
Anúnciase'l fichaxe d'Alejandro Valverde que vuelve a la competición dempués de la so sanción por dopaxe de 2 años.
2012
La temporada de 2012 vio como l'equipu restablecíase como unu de los principales contendentes de la clasificación xeneral. Fíchense grandes corredores como'l rodador italianu Giovanni Visconti, los vascos Beñat Intxausti y Jonathan Castroviejo y el mozu Nairo Quintana, amás del regresu de Valverde.
El regresu de Valverde casi darréu traxo l'ésitu del equipu con una victoria d'etapa nel Tour Down Under, siguíu pola victoria na xeneral de la Vuelta a Andalucía, según una victoria d'etapa. El nuevu recluta colombianu Nairo Quintana tamién traxo la victoria del equipu polo xeneral na Vuelta a Murcia.
Nel Tour de Francia, Alejandro Valverde conquistó la 17ª etapa con final en Peyragudes tres una llarga fuga. Sicasí, nun pudo lluchar por entrar nel podiu (que yera'l so oxetivu) en sufriendo una cayida na primer selmana y perder enforma tiempu.
La Vuelta a España confirmó que'l Movistar yera unu de los equipos más fuertes de la temporada. Empezaron imponiéndose na CRE por equipos de Pamplona, na so tierra. Dempués ganaron con Valverde dos etapes más (les remataes en Arrate y Collada de la Pita), amás de llevar al murcianu hasta la 2º plaza na xeneral, tan solo por detrás d'Alberto Contador. Tamién s'axudicaron la xeneral final por equipos.
El murcianu cerraría una estupenda temporada llevándose'l bronce nel Mundial de Ruta de 2012. L'equipu remató 5º na xeneral por equipos de la UCI, mesma posición qu'ocupó Valverde n'individuales.
La temporada de 2013 como nos años anteriores, Valverde llogró dellos resultaos positivos de primeres de temporada col Troféu Serra de Tramuntana y un trunfu na xeneral na Vuelta a Andalucía, amás de conquistar dos etapes.
Quintana reforzó entá más el so potencial como gran escalador cola victoria na xeneral de la Vuelta al País Vascu, según reclamar el segundu llugar nel Tour de Francia, siendo tamién el rei del monte y el meyor nuevu, en realizando una última selmana impecable. Amás nel Tour, un gran Rui Costa llevóse dos etapes. Quintana reforzó entá más la so reputación como una fuercia a tener en cuenta, con una victoria xeneral na Vuelta a Burgos tres una exhibición na etapa reina nes Llagunes de Neila.
L'equipu tamién tuvo una destacada actuación nos dos restantes grandes vueltes, el Giro d'Italia y la Vuelta a España. Nel Giro, axudicáronse la friolera de cuatro etapes, dos con Giovanni Visconti (una d'elles con final en Col du Galibier so una intensa nevada), la llarga crono individual con Alex Dowsett y una de mediu monte con Beñat Intxausti, qu'amás portó la maglia rosa mientres un día.
Na Vuelta a España, nun consiguieron victories d'etapa, pero Valverde acabó un añu más 3º na xeneral, amás de llevase'l maillot verde de la clasificación de la regularidá.
Intxausti consiguió última victoria na xeneral del equipu del añu, ganando'l Tour de Beixín (amás de llevase una etapa) y Costa ganó'l Mundial en Ruta, nel que Valverde foi 3º.
Por cuenta de los grandes resultaos, l'equipu acabó como'l ganador del UCI WorldTour 2013 (na modalidá d'equipos) y Valverde foi terceru individualmente en dicha clasificación. Pa la temporada 2014 l'equipu confirmó que diben pasar de bicicletes Pinarello a Canyon Bicycles.
L'equipu adoptó una planificación y una táctica basáu nes Grandes Vueltes; primero la unviada de Nairo Quintana al Giro, Alejandro Valverde al Tour y, finalmente, los dos pilotos a la Vuelta.
En mayu, Quintana ganó la primera Gran Vuelta del equipu dende l'añu 2009 tres la victoria na Vuelta de Valverde, el Giro d'Italia 2014. El colombianu amás, ganó dos etapes, les montascoses de Martello y la crono esguilada del Crespano del Grappa. Tamién s'axudicó la maglia bianca como'l meyor nuevu.
Al igual que na temporada anterior, Quintana defendió'l so títulu de la Vuelta a Burgos ganándola per segundu añu consecutivu.
Na Vuelta a España empezó ganándose la CRE por equipos de Xerez de la Frontera. Na sesta etapa rematada en Cumes Verdes, Valverde ganó y fíxose col lideralgu, qu'aguantó hasta la etapa d'Aramón Valdelinares cuando lo dexó al so compañeru d'equipu Nairo Quintana. Sicasí na CRI, Quintana sufrió una cayida que-y obligó a abandonar y Valverde quedó como únicu xefe de files. Na última etapa, una CRI de 10 km en Santiago de Compostela, Malori axudicóse la victoria y Valverde xubió al podiu, de nuevu como 3º.
Magar que l'equipu nun llogra'l so oxetivu principal cola victoria nel Tour de Francia -Nairo Quintana termina 3º y Ion Izagirre salva l'honor con un brillosu trunfu en Morzine-, la temporada ye de los meyores de la so historia.
Cuarta victoria consecutiva nel UCI WorldTour; récor de trunfos (36 victories, igualando al Banesto '98, con 14 ciclistes distintos); una ‘grande', la 14ª pal equipu d'Unzué, con el mesmu Nairo na Vuelta; y ésitos en carreres de postín como Flecha Valona (Valverde), Romandía, Catalunya (Quintana) o'l títulu européu contrarreló de Castroviejo, que suma amás un brillosu bronce nel Mundial CRI. Telefónica anueva'l so compromisu en setiembre hasta final de 2019.
2017
Una temporada de contrastes. El meyor añu de la historia na so primer metá y una segunda parte pa escaecer, desque Alejandro Valverde sufriera una grave cayida na etapa inaugural del Tour, el 1 de xunetu en Düsseldorf.
Antes, cuatro meses de suañu con casi una trentena de victories; el meyor Valverde de la historia (11 trunfos hasta abril, con Flecha, Liexa, País Vascu o Cataluña); o dos trunfos d'etapa, ganadores d'equipu y podiu final (2º) nel Giro con Quintana (que se quedó a solu 31 de la maglia rosa).
A la fin 31 victories, col pasu alantre de los mozos Soler, Carapaz o Pedrero como puntu positivu na desafortunada segunda metá del añu.
Nun cunta con un equipu na categoría amateur, pero nos últimos años nutrióse de la cantera del Lizarte-Cromaos Orejanavarru. Amás, en 2011, al entrar el patrociniu de Movistar, creóse un equipu filial suramericanu de categoría Continental llamáu Movistar Team Continental, que namái permaneció dos temporaes sumiendo a finales de 2012. Dende 2018, cuenta con un equipu femenín p'apostar les pruebes más importantes del calendariu internacional: Movistar Team - Equipu UCI Women's Team femenín.
A partir de 1999 y hasta 2004 la UCI estableció una clasificación por equipos estremaos en tres categoríes (primer, segunda y tercer). La clasificación del equipu y del so ciclista más destacáu foi la siguiente:[16][17]
A partir de 2005 la UCI instauró'l circuitu profesional de máxima categoría, el UCI ProTour, onde l'equipu ta desque se creó dicha categoría. Les clasificaciones del equipu y del so ciclista más destacáu son les siguientes:[18][16][17]
Tres discrepancies ente la UCI y los organizadores de les Grandes Vueltes, en 2009 túvose que refundar el UCI ProTour nuna nueva estructura llamada UCI World Ranking, formada por carreres del UCI World Calendar; y a partir del añu 2011 xuniéndose na denominación común del UCI WorldTour. L'equipu siguió siendo de categoría UCI ProTour y les clasificaciones son les siguientes:[19][20][21][22]
