Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Nueva Galas d'o Sud muga a o norte con Queensland, a l'ueste con Australia Meridional, a o sud con Victoria y a l'este con a mar de Tasmania. O Territorio d'a Capital Australiana y o Territorio d'a Badía de Jervis forman una entidat administrativa deseparada que ye rodiada íntegrament por Nueva Galas d'o Sud. O estau se divide cheograficament en cuatre arias. As tres ciudaz mas grans de Nueva Galas d'o Sud, Sydney, Newcastle y Wollongong, se troban amán d'o centro d'una estreita francha costera que s'estendilla dende as zonas templadas fredas d'a costa d'o sud dica as zonas subtropicals amán d'a muga con Queensland.
Fisicament, o estau de Nueva Galas d'o Sud puet dividir-se en cuatre seccions:
A francha costera, con climas que van dende o fredo templau en l'extremo sud dica o cuasi subtropical en a muga con Queensland.
As rechions montanyosa d'a Gran Barrera Divisoria y as tierras altas en a suya redolada. Muitos picos blincan d'os mil metros d'altaria, estando o mas alto o Mont Kosciuszko, con 2.229 metros.
As planas destinadas mas que mas a l'agricultura que ocupan buena parti d'a superficie d'o estau. A densidat de población ye astí muit inferior a la d'a costa.
As planas aridas de l'extremo noroccidental d'o estau, cuasi inabitables.
A rechión d'Illawarra se centra en a ciudat de Wollongong, con Shoalhaven, Eurobodalla y a Costa Sapphire a o sud. A Costa Central se troba entre Sydney y Newcastle, con as rechions de Mid North Coast y Northern Rivers que pelgan dica o norte d'a muga con Queensland. O turismo ye important ta a economia d'as ciudaz costeras, como Coffs Harbour, Lismore, Nowra y Port Macquarie, pero a rechión tamién produce mariscos, carne, lactios, fruitas, canya de zucre y fusta.
A Gran Sierra Divisoria s'estenilla dende Victoria, en o sud a traviés de Nueva Galas d'o Sud dica Queensland, paralela a la estreita plana costera. Ista aria incluye as Montanyas Snowy, os altiplanos d'o norte, centro y sud, as tierras altas d'o sud y as versants d'o sudueste. Encara que no son particularment pronunciaus, muitos tozals d'a sierra plegan dica mas de 1.000 metros d'altaria, con o Mont Kosciuszko como punto mas alto con os suyos 2.229 m. O esquí en Australia prencipió a practicar-se en ista rechión, en Kiandra arredol d'o 1861. A temporada d'esquí relativament curta tien impacto turistico mas que mas en as Montanyas Snowy. L'agricultura, en particular a industria d'a lana, ye important a o largo d'as tierras altas. Entre os centros prencipals s'incluyen Armidale, Bathurst, Bowral, Goulburn, Inverell, Orange, Queanbeyan y Tamworth.