Os almurabiz en Al-Andalus representoron un poder mes fuerte que os estaus musulmans d'o periodo d'as primeras taifas, a las que substituyoron. Consiguioron aturar por bel tiempo l'abance d'os cristianos respecto a los musulmans. Si a lo principio representaban un movimiento islamico rigorista defensor d'a ortodoxia sunní, con o tiempo se fuoron relaxando como efecto d'o contacto con a cultura d'Al-Andalus.
En Al-Andalus gubernoron como una superestrutura militar. L'administración contina en mans de secretarios y alfaquís muladís partidarios d'a ortodoxia sunnita promovita por os almurabiz. A capital d'os almurabiz en Al-Andalus estió Granada dende 1090 dica 1148. L'antiga tolerancia relichiosa relativa se malmete y esto tiene consecuencias en a composición etnica. Muitos mozarabes fuyen ta o norte cristiano, y part d'os que se quedan son deportatos ta Africa. Bels musulmans de territorio cristiano son forachitatos ta o sud controlato por as taifas y os almurabiz. S'acelera o proceso de desaparición d'os dialectos mozarabes.
O periodo almurabit fue succedito por un breu periodo de segundas taifas, anterior a la invasión d'os almuades.
Invasión almurabit
Os reis taifas de l'Al Andalus aduyaban a lo rei Suqut de Ceuta, que lis feba de barrera contra l'abance Almurabit. O rei de Sevilla ordena a lo gobernador d'Alchacira d'Alfadra que fortificase a costa de Chibraltar. Cuan os reyes taifas andalusís se veyen amenazatos por os abances d'Alifonso VI de Castiella y Leyón en Sevilla y Badajoz, a flota sevillana aduya a os almurabiz a prener Ceuta (1083).
Al Almurabiz plegan ta l'Al Andalus en 1086, clamatos por os reis taifas. Luitan contra Alifonso VII de Castiella y Pero I d'Aragón y Pamplona. O emir Yusuf Ibn Tasufín vence a os cristianos en Zallaqa. Vencitos os enemigos mes importants, prenen dende 1090 o control de totas as taifas menos as d'Albarracín, Alpuent y Zaragoza, que tardoron mas en ocupar porque no podeban atacar-as bien dica que no prenesen Valencia, feito que esdevenió en 1102, con a desaparición d'o estau controlau por o Cit Campiador.
O segundo gobernador almurabit de Zaragoza, Abu Bakr ibn Tifliwit (1115-1117) deixa una ciudat aislata cuan muere y o Batallero la conquista o 18 d'aviento de 1118.
A conquista cristiana de Zaragoza, a fin d'una ofensiva con a derrota de Cutanda en 1120, y la expedición d'Alifonso I lo Batallero por Andalucía yeran una contrimuestra d'a debilidat y decadencia d'os almurabiz. En Marruecos ya se coceba o movimiento almuade.
Os musulmans andaluces aproveitoron a menor presencia d'almurabiz pa fer revueltas en a decada de l'anyo 1140, coindidindo con a caita de Sichilmasa en mans d'os almuades. Os aragoneses y atros repobladors cristianos d'o territorio aragonés tornoron a abanzar en territorio almurabit en os anyos 1141 y 1142 baixo o mandato de Remón Berenguer IV de Barcelona.
O periodo de segundas taifas encomienza en l'anyo 1144, cuan os musulmans andaluces se sublevan en a redolata de Mértola y creyan un reino taifa independient gobernato por o rei Ibn Qasi.
