Willem van Yper

Willem van Yper (of Willem van Lo) (ca. 1090 – Lo, 24 januoari 1162 of 1164), was burggroave van Yper en groave van Kent.

Je was ’n ounwettige zeune van Filips van Lo (†1104) en zyn byzit, die van geweun volk ofkomstig was en de dame van Lo genoemd wordt. Filips van Lo, de joungste zeune van Robrecht de Fries, haad e versterkte vestigienge gebouwd in Lo, woa dan ôok de Augustynermonnikn in 1093 hunder St.-Pietersabdye (1093-1797) bouwdn. De St.-Pieterskerke is nog e stik van die abdye.

Willem trouwde met e dochter van Godfried van Leuven, de zuster van Adelheid van Leuven, die keuniginne van Iengeland was deurda ze getrouwd was mè keunienk Hendrik I van Iengeland.

Willem probeerde verschillige kêern zyn rechtn ols ipvolger van de groaf van Vloandern ip te eisn, omdat ’n den ênigstn overlevenden noakommelienk in mannelikke lyne van Robrecht de Fries was, mo dat is hem nie gelukt omdat ’n gin wettige zeune was.

• 1119: Boudewyn VII van Vloandern stierf zounder ipvolger. Karel de Goein, die ôok e klêenzeune van Robrecht de Fries was, mo langs moeders kant, volgdeg hem ip. De moeder van Boudewyn VII, Clementia van Bourgondië, ha pertang vo Willem gevochtn.
• 1127: Karel de Goein stierf zounder ipvolger. Je wierd ipgevolgd deur Willem Clito, de klêenzeune van Willem de Veroveroare en Mathilda van Vloandern, ounder druk van de Fransche keunienk Lodewyk VI. Willem van Yper betwistte die keuze deur hem mêester te moakn van Veurne, Kassel, Ariën (Aire) en Sint-Winoksbergen (Bergues). Doarip trok Lodewyk VI, tegoare mè Gervaas van Praet en Willem Clito, met e gewoapend leger nor Yper. D’Yperliengn lietn hunder binn langs de stadspôortn en ze kostn Willem gevangn pakkn. Je wierd ipgeslootn in ’t gevang van Rysel.
• 1128: Achter den dôod van Willem Clito probeerde Willem van Yper were groaf van Vloandern te wordn, mo je verlôor van Diederik van den Elzas, die hem in 1133 uut Vloandern verbande en zyn bezittiengn ansloeg. Loater krêegt ’n zyn rechtn ip ’t burggroafschap van Yper were.

Verbann uut Vloandern trok Willem no ’t hof van Iengeland en in 1135 wierd ’n kapiteing van e Vlams heurliengnleger binst de burgeroorloge van 1135-1154, in dienst van keunienk Stefanus van Iengeland. Willem was zyn rechterhand en in 1141 benoemde Stefanus hem, vo beweezn dienstn, tout groave van Kent. Willem stichtte doa Boxley Abbey, e Cisterciënzerklôoster (1143-1146).

Round 1155 zette keunienk Hendrik II hem of van zyn titel van groave van Kent en je most Iengeland verloatn. Je trok hem were in zyn kastêel in Lo, woa dat ’n loater gestorvn is.

In 1770 hen ze zyn restn ipgegroavn en herbegroavn in ’t zudelik kôor van de St.-Pieterskerke van Lo. Reks neffest ’t altoar, in de meurnisse, stoat er e kistje met ’t gebêente van Willem van Lo.