Hans Peter Janssens

Hans Peter Janssens (Brugge, 19 moarte 1962) is ‘n West-Vlamschn zanger/acteur, geschoold in klassieke muziek. J'is ipgegroeid in Brugge, moa je weunt in Antwerpn. In ‘t joar 1992 most ’n in Londn ‘n nieuwe noame zoekn, omdat er doar ol ’n Peter Janssens lid van d’n artistnbound was, en da mag nie in de Britse kunstweireld.

• Stedelik conservatorium Brugge
• Keuninklik Muziekconservatorium Gent. J’oalde doa ’n eeste prys ounder leidinge van Zegher Vandersteene, Malcolm King, Erika Pauwels en Paule Daloze.
• In Ingeland: Binst de zomerstages in Alden Biesen kwamt ’n in contact mè Noelle Barker. Zy overtuugdeg èm vor ’n studiebeuze an te vroagn vo de Guildhall School of Music and Drama in Londn. Ze gaft doa lesse en j’oalde doa ’n postgraduoat Vocal Studies. Ansluutnd kost ’n noa de Music Academy of the West Santa Barbara. Die Spartoanse ipleidinge van ‘t Angelsaksisch ounderwyssysteem èt em g’olpn vo ’t loater woa te moakn in d’arde musicalweireld.

Achter Santa Barbara ginkt ‘n doa vier joar mee met ’n reiznd operagezelschap.

In z’n eeste joarn zoungt ‘n surtout muziek van Johann Sebastian Bach, o.a. de Jesusrolle in de Passionen mè Patrick Peire, moar ook de rolln Don Giovanni en Guglielmo in Cosi fan tutte van Wolfgang Amadeus Mozart.

Loater ist ’n overgestapt noa de musical met de rolle van Padre in De Man van la Mancha met ’t Keuninklik Ballet van Vloandern. Ook Jesus Christ Superstar, Chess en Sacco & Vanzetti. In The Phantom of the Opera zoungt 'n de dubbelrolle, zowel Phantom as Raoul. En ook in Jekyll & Hyde, zowel Jekyl as Hyde.

In 1998 kwamt er ’n nieuwe fase in z’n carrière. In de stadsschouwburg van Antwerpn speeldegt ie de rolle van Valjean in de Nederlandstoalige versie van Les Misérables, van meie 1998 tout april 1999. Loater ook in ’t Frans en ton durfdegt ie ’n auditie doen in Londn, woa dat de musical ol tweeëntwintig joar speelt. Van oktober 2000 tout juli 2003 èt ’n doa Valjean gespeeld, acht voorstellingn per weke (de zundag twee). En j’ist er gelauwerd as langst spelendn Valjean ooit.

Van 2006 tout juli 2008 speelt ’n de rolle van de slechtn, Javert van Les Misérables in the Queens Theatre in Londn.

• Officiële website

• Fansite