Sixte III (mòrt lo 19 d'aost de 440) foguèt lo 44^en papa de la Glèisa Catolica Romana dau 31 de julhet de 432 au 19 d'aost de 440. Succediguèt a Celestin I^èr (422-432) e foguèt remplaçat per Leon I^èr (440-461).

Lei premiereis annadas de sa vida son mau conegudas. Pasmens, dins lo corrent de sa jovença, auriá agut una inclinason per lo pelagianisme avans de se raliar a l'ortodòxia de la Glèisa. Puei, venguèt un membre important de l'entorn dei papas Zosim, Bonifaci I^èr e Celestin I^èr. Après son eleccion, acomencèt una politica de construccion de monuments religiós coma la Basilica de Santa Maria Majora. Regardant lei relacions ambé lei Glèisas d'Orient, assaièt de trobar una solucion d'amaisament après la crisi dau nestorianisme mai contunièt de defendre ambé fermetat lei prerogativas de Roma en fàcia dei revendicacions dau patriarcat de Constantinòple.