Oryctolagus cuniculus

Oryctolagus cuniculus

Lapin / Conilh, individú salvatge

Classificacion
Règne	Animalia
Embrancament	Chordata
Sosembr.	Vertebrata
Classa	Mammalia
Sosclassa	Theria
Infraclassa	Eutheria
Òrdre	Lagomorpha
Familha	Leporidae

Genre

Oryctolagus
Lilljeborg, 1874

Nom binominal

Oryctolagus cuniculus
(Linnaeus, 1758)^[1]

Sinonims

Lepus cuniculus L., 1758

Reparticion geografica

Estatut de conservacion UICN

( NT )
NT : Quasi menaçat

Lo conilh (var. coniu) o lapin europèu, Oryctolagus cuniculus (Linnaeus, 1758), es un pichon mamifèr de l'òrdre dels lagomòrfes e de la familha dels leporids. Sola espècia del genre Oryctolagus, l'Oryctolagus cuniculus es comun en Euròpa, en Austràlia e un pauc de pertot dins lo mond. Se destria:

Lo conilh de garena quand es salvatge.
Lo conilh domestic, d'elevatge, amb de raças e varietats nombrosas.

Nomenclatura e sistematica

De pas confondre lo conilh europèu, unic leporid del genre Oryctolagus amb d'autres conilhs de la familha dels leporids, apartenent a d'autres genres coma per exemple lo conilh d'America.

Sosespècias de còps reconegudas del conilh de garena^[2] :

ITIS
- Oryctolagus cuniculus cuniculus (Linnaeus, 1758), l'ancèstre del conilh domestic.^[3]
- Oryctolagus cuniculus huxleyi Haeckel, 1874
NCBI
- Oryctolagus cuniculus algirus, que sa preséncia es limitada a Galícia, Portugal, e a la mitat sud-oèst de la Peninsula Iberica. De talha un pauc mai pichona que O.c.cuniculus^[3].

Descripcion

Morfologia

Lo conilh se diferéncia de la lèbre per mantuna caracteristica :

d'aurelhas mai cortas que lo cap ;
un iris brun sombre ;
l'ongla d'artelh pas fenduda ;
una gestacion de 31 jorns ;
de pichons que naisson cècs e nuds;
la vida en societat ierarquizada ;
44 cromosòmas.

A una forradura doça, d'aurelhas longas (pus cortas çaquelà que las de la lèbre) e una coa pichona.

Se lo conilh de garena pesa environ 2 kg per 45 cm de long, la talha dels conilhs domestics varia enòrmament d'una varietat a l'autra (Nowak, 1999). Lo mai grand, lo gigant de las Flandras, pòt aténher 8 kg e 80 cm de long mas lo conilh marran nan despassa a pena 1 kg, de còps mens pels conilhs extranans. La forradura es originalament gris biset - amb de còps de nuanças negras o rossas - e un ventre pus clar e lo dejós de la coa blanc, mentre que los conilhs domestics presentant de colors fòrça variadas, unifòrmas, degradadas o pigalhadas. N'existisson environ 80 varietats (ADW).