Mylène Farmer, escais de Mylène Gautier, es una cantaira e actritz francesa nascuda lo 12 de setembre de 1961 a Pierrefonds a Quebèc (Canadà)[1]. Es la cantaira francesa qu'a vendut lo mai de disques dempuèi las annadas 80, es tanben l'artista qu'a classat lo mai de títols a la primièra plaça del Top 50.
Biografia
Son paire, Max Gautier, es nascut en Occitània (a Marselha, Provença). Per sa maire, Mylène es de soca bretona. Nascuda dins la banlega de Montreal en Canadà quand son paire i trabalhava, tòrna de caps sos uèit ans en França ambe sa familha còsta París. Adolescenta, sauneja de far de cinèma, e venguda adulta, coma primièrs emplecs comença per far un pauc de manequinat e de jògar dins filmòts publicitaris.
Dins las annadas 80, ven amiga ambe lo compositor Jérôme Dahan qu'aviá compausat ambe lo productor Laurent Boutonnat una cançon titolada Maman a tort. Es una cançon inspirada de la vida de l'actritz americana Frances Farmer que sa maire faguèt embarrar dins un espitau psiquiatric. Es aital que Mylène es estada amenada a cantar e enregistrar aquesta cançon, en prenent al passatge coma escais de scèna lo de Farmer del nom de l'actritz que n'inspirèt lo tèxte.
En 1984, Maman a tort ven una sansònha en França. La capitada d'aquesta cançon marca lo debut d'une longa carrièra de cantaira per Mylène Farmer que, fin finala, va venir una de las cantairas francesas mai famosas e mai popularas, ambe cançons d'ara enlà vengudas cultas (Désenchantée, Libertine, Pourvu qu'elles soient douces, Sans contrefaçon, XXL, Dégénération, C'est une belle journée, Appelle mon numéro, Oui mais... non, Je te rends ton amour, C'est dans l'air...)
.jpg)