Michael Waller (6. september 1941–29. april 2008)^[1][2] var ein engelsk trommeslagar, som spelte med mange kjende britiske rocke- og bluesartistar etter han vart profesjonell musikar i 1960.

Waller vart fødd i Hammersmith i London.^[1] Det første bandet hans, The Flee-Rekkers, fekk ein hit med «Green Jeans» i 1960 då denne nådde 23. plassen på UK Singles Chart.^[3] Han slutta kort tid etter og vart medlem av Joe Brown and the Bruvvers.^[1]

I juli 1963 vart han med i Cyril Davies R&B All Stars med Cyril Davis og Long John Baldry. Waller slutta då Davies døydde i januar 1964 og Baldry tok over og bandet vart Hoochie Coochie Men. Waller byrja så å spele med Marty Wilde som medlem av The Wildecats.^[1] Waller spelte òg på to konsertturnear med Little Richard i Storbritannia.^[4]

Etter ein kort periode med Georgie Fame and The Blue Flames, vart han med Brian Auger i The Trinity,^[1] og kort tid etter byrja Long John Baldry. I april 1965 vart gruppa utvida med Rod Stewart og Julie Driscoll og utvikla seg til å bli The Steampacket.^[1] I 1967 spelte Waller eit par konsertar med John Mayall's Bluesbreakers^[1] men vart kort tid seinare erstatta av Keef Hartley.

I august 1967 byrja Waller å spele med Jeff Beck Group, i lag med den tidlegare bandkollegaen Rod Stewart.^[4] I 1969 drog Waller til Venice Beach i Los Angeles for å skipe bandet Silver Metre med gitaristen Leigh Stephens frå Blue Cheer, Pete Sears på bass og klaverinstrument og Jack Reynolds som songar. Dei spelte inn eitt album.^[5] I 1969 spelte Waller òg på debutalbumet til Rod Stewart, An Old Raincoat Won't Ever Let You Down,^[6] og spelte òg på seinare album av Stewart, inkludert hitsingelen «Maggie May».^[1]

I 1971 byrja Waller å spele med bluesbandet til Long John Baldry. Tidleg i 1980-åra var Waller medlem av Terry Smith Blues Band. Waller har òg spelt med The Walker Brothers, Cat Stevens, Eric Clapton, Bo Diddley, Dusty Springfield og Paul McCartney.^[4]

Waller døydde av leversvikt^[2][4] i London den 29. april 2008, 66 år gammal.^[1]

• Minneord i The Guardian