Kyrkja har galleri langs nord- og vestveggen, og orgelet er plassert i den sørlege delen av vestgalleriet. Inventaret er rikt og frå ulike tidsepokar. Berre døypefonten er bevart frå mellomalderen.

Altartavla

Dei eldste delane av altartavla er frå ca. 1600. Biletet av nattverda var dekt av overmåling i ei årrekkje, og vart avdekt og restaurert av Ulrik Hendriksen i 1938. Den lange teksten er underteikna med BERNHARDUS og aller nedst ANNO 1630. Altartavla vart måla på nytt i 1703.

Preikestolen

Preikestolen var ei gåve til kyrkja frå Adrian Busch i 1602 og vart laga av Nicolaus Petri Ripen. Han har fem fag. Av desse har fire målerier av evangelistane. Desse er frå same tid som oppmålinga av altartavla i 1703 og er utført av same Contrafeyer.

Preikestolhimlinga

Preikestolhimlinga er åttekanta og dekorert med akantus. På midstokken er speilmonogrammet til Kristian VI med englar omkring.

Døypefonten

Døypefonten er av romansk type. Sjølve kummen er av granitt og foten av kleberstein. Kummen er laga til ein annan fot enn han står på. Delane passar ikkje saman, og partiet mellom kummen og foten er difor fylt med småstein.

Døypefonthimlinga

Over døypefonten heng ein himling i raudt, grønt og gull med akantusbøylar. Himlinga har ei innskrift der det står: «Gud og Kirken helliget Anno 1739».

Kristusfiguren

Kristusfiguren er ein kopi av Bertel Thorvaldsen sin figur «Kristus», som står i Vor Frue kirke i København. Skulpturen var ei gåve til kyrkja i 1871.