Hausten 2020 og vinteren 2021 fekk «Arcade» ny popularitet då han gjekk viralt på det sosiale mediet TikTok. Suksessen førte til nye sal- og listesuksessar.[5][6][7]
Om songen
Bakgrunn
«Arcade» er skriven av den nederlandske songaren Duncan Laurence saman med Wouter Hardy og den svenske låtskrivaren Joel Sjöö.[8] Laurence henta inspirasjon til songen ved å bruka hendingar frå sitt eige liv, blant anna ved å bruka historia til ein nær person som døydde i ung alder.[9] «Eg valde å kalla songen "Arcade" – orda og akkordane kom av seg sjølv, som gjer at den høyrast så organisk ut, trass skifta i songen», fortalde Laurence då songen vart lansert.[9]
I samarbeid med dei to andre låtskrivarane utvikla songen seg til å bli ein «delt, felles historie, og ikkje berre min eigen.» Duncan fortalde vidare at «Arcade» er ei historie om jakta på eins livs kjærleik, og at songen skildrar vona om det nokon gongar uoppnåelege.[9][10] Ordet «arcade» vert berre nemnt éin gong i teksta, og tittelen referer til eit arkadespel, jamfør tekstlinja: «Small town boy in a big arcade, I got addicted to a losing game» (norsk omsetjing 'småbygut i eit stort arkadespel, eg vart avhengig av eit spel eg er dømd til å tape').[11]
Mottaking
«Arcade» er ein popballade med engelsk tekst og vart offentleggjort 7. mars 2019 som det nederlandske bidraget til Eurovision Song Contest. Etter lanseringa vart songen favoritt til å vinne tevlinga, og i tida før Eurovision Song Contst toppa han veddemålslister og oddslister.[12][13][14] Favorittstempelet førte til at den nederlandske kringskastaren NPO allereie før tevlinga byrja å førebu seg på å arrangere Eurovision Song Contest 2020 om «Arcade» skulle vinne.[15][16][17]
«Arcade» vart vald internt av kringkastaren AVROTROS til å representere Nederland i Eurovision Song Contest 2019 i Tel Aviv. I januar 2019 vart Nederland trekt til å delta i den andre semifinalen av Eurovision Song Contest. Semifinalen vart arrangert i Expo Tel Aviv i Israel torsdag 16. mai, og Nederland hadde startnummer 14.[18] I avrøystinga vart «Arcade» blant dei ti beste i semifinalen, og kvalifiserte seg dimed til finalen laurdag 18. mai.[19] I finalen hadde songen startnummer 12.[20]
«Arcade» enda på tredjeplass i juryavrøystinga og kom på andreplass i telefonavrøystinga, men vann Eurovision Song Contest samanlagt med 498 poeng. Dett var den femte sigeren til Nederland i tevlinga, og den fyrste på 44 år etter at gruppa Teach-In og «Ding-a-dong» vann i 1975.
Suksess på TikTok
Hausten 2020 og vinteren 2021 fekk songen ny popularitet då han gjekk viralt på det sosiale mediet TikTok. Suksessen gav nye sal- og listesuksessar.[5][6][7] I januar 2021 vart «Arcade» den mest strøymde Eurovision-låten nokon gong på Spotify, og passerte «Soldi» med Mahmood, som vart nummer to i Eurovision Song Contest 2019.[21]
