Howard is de Söhn vun den bekannten Schauspeler Rance Howard, wat de Grund dorför weer, dat he al bannig fröh in’t Filmgewarf rinkamen is. Sien Vadder neemlich het em un sien Broder Clint Howard faken in Kinnerrullen ünnerbröcht. Johrenlang is he dorüm ünner den Naam Ronny Howard föhrt worrn. He is dormit een vun de wenigen Kinnerstars, de ok noch as utwassen Minsch mit Spood bi’n Film arbeiten doot. Sien Intresse anvt Filmemaken hett he al in sien Jöögd opdeckt. Mit sien Vadder un de Fmailie as Schauspelers hett he en poor lüttere Filmen dreiht, de to’n Deel sogro al uttekent worrn sünd.
In de Feernsehreeg Andy Griffith Show hett he – as Ronny Howard – al teemlich fröh mitspeelt. In’t Kino harr he sien eersten Spood 1973 in den Film American Graffiti vun George Lucas. Dorna hett he mehrere Johren in de SitcomHappy Days mitspeelt. En gröttere Nevenrull speel he 1976 in The Shootist, wat de letzte Film vun John Wayne weer.
En Johr later hett sien Loopbahn as Speelobaas anfungen, as he an den Low-Budget-FilmGrand Theft Auto arbeit hett. Eenige Johren hett he dorna as Speelbaas bi Feernsehregen arbeit, bit Anfang vun de 1980er Johren sien Dörbrook in Hollywood keem. Siet de Tiet hett he an vele bekannte Produkschonen mitarbeit. Vundaaggellt he as een vun de groten Hollywood-Speelbasen. De Hööchpunkt vun sien Loopbahn bit hüüt weer 2002 de Utteken mit twee Oscars in de Kategorien Best Speelbaas un Best Film för A Beautiful Mind. 2008 weer he nochmol wedder för den Oscar nomineert, ditmol för den Film Frost/Nixon
Howard is siet 1975 mit de Schrieversche Cheryl Howard verheiraat, mit de he veer Kinner hett. Sien Dochter Bryce Dallas is ok Schauspelersche bi’n Film worrn.
