Kierch vu Bouneweg
Parkierch vu Bouneweg (2013)
Uertschaft / Plaz	Stad Lëtzebuerg (Bouneweg)
Par	Lëtzebuerg Notre-Dame
Dekanat	Lëtzebuerg
Numm / Patréiner	Maria Friddenskinnigin
Konsekratioun	1965
Architekt(en)	Pierre Reuter Léon Loschetter
Baujoer	1965
Koordinaten	49° 35’ 47.3’’ N       06° 08’ 18.3’’ O
Kierchen - Kapellen

D'Kierch zu Lëtzebuerg-Bouneweg ass eng kathoulesch Kierch, déi zur Par Lëtzebuerg Notre-Dame, zum Dekanat Lëtzebuerg an zu der Gemeng Lëtzebuerg gehéiert.

D'Kierch ass der Friddenskinnigin Maria geweit. D'Fest gëtt den 22. August gefeiert. Niewepatréiner sinn den hellege Jousef (Festdag: 19. Mäerz) an d'helleg Irmina (Festdag: 3. Januar)

Se steet zu Bouneweg an der rue du Cimetière op der Kräizung mat der rue de Hesperange CR224) an der rue Pierre Krier (CR226).

Zur fréierer Par Bouneweg gehéiert ausser der Parkierch vu Bouneweg och nach eng Willibrordus-Kapell zu Bouneweg-Nord (an der Schoul um Eck rue P. Hentges - bld de la Fraternité).

Well am Zweete Weltkrich d'Jousefskierch vu Bouneweg aus dem Joer 1887/88 bei engem Bombardement den 9. August 1944 zerstéiert gouf, huet missen eng nei Kierch gebaut ginn. Där hire Grondstee gouf den 23. Oktober 1949 geluecht. D'Pläng ware vun den Architekte Pierre Reuter a Léon Loschetter. D'Material dat verschafft gouf an d'Konschtwierker kommen alleguer exklusiv vu Lëtzebuerg. Se gouf de 27. Juni 1965 vun de Bëscheef Léon Lommel a Jacques Mangers souwéi dem Abt Petrus Borne vun Tholey geweit, mä se war awer schonn éischter fäerdeg an am Gebrauch.

D'Kierch huet och eng Krypta.

De Mosaik op der Baussefassad ass vum Gabriel Loire vu Chartres a weist d'Muttergottes.

D'Géigestänn an d'Dekoratioun aus der Bouneweger Kierch stame vu verschiddene Lëtzebuerger Artisten:

• Charles Kohl: Altor vun der Tréischterin am Leed
• Albert Hames: Statu vun der Tréischterin am Leed, Jousefsaltor, zwéin Amboe mat engem Relief drop, Kräizwee (mat 15 Statiounen) aus Steen, Pietà, Dafsteen, Volleksaltor mat der leschter Owesmoolzecht, Häerz-Jesu Statu
• Emile Probst: Kräizegungszeen aus Kofferplacken am Chouer
• Ben Heyart: Mosaik vun der Daf vum Jesus

D'Fënstere si vu François Gillen, Gustave Zanter, Joseph an Emile Probst, a se weisen

• op der lénkser Säit
  • Hl. Kunigunde
  • Hl. Amalberga
  • Séileg Yolanda
  • Hl. Irmina
  • d'Maria als Kinnigin (am Querschëff)
• op der rietser Säit
  • Hl. Willibrord
  • Séilege Schetzel
  • Hl. Mäerten
  • Hl. Haupert
  • d'Maria an der Bibel (am Querschëff)

D'Uergel ass vun der Firma Kemper vu Lübeck a gouf 1957 vum Bëschof Lommel ageseent.

Am Klackentuerm hänke 5 Klacken.

Si lauden an den Téin h° d' e' g' h' / si² re³ mi³ sol³ si³

• Ons Stad N°79, 2005, S. 19-23, Michel Behm, Bonneweg und seine Kirchen

• Lëscht vu reliéise Gebaier zu Lëtzebuerg
• Lëscht vun de Lëtzebuerger Paren

Commons: Kierch Lëtzebuerg-Bouneweg – Biller, Videoen oder Audiodateien

• Websäit vun der Par Bouneweg
• Chronik vun der Par Bouneweg
• Artikel iwwer d'Konzeptioun vun der Kierch
• D'Fënstere vun der Kierch vu Lëtzebuerg-Bouneweg op der Websäit vun der Stiftung Forschungsstelle Glasmalerei des 20. Jh. e. V. (de)
• D'Uergel vun der Kierch op Orgues.lu
• Kuerzfilm De 27. Me' 1945 - Bo'neweg e'ert seng gefâlen Helden. aus dem Archiv vum CNA (ouni Toun, 17 Minutten), deen déi éischt, zerstéiert Kierch nom Enn vum Krich weist