Kerak telor

Kerak Telor

Kerak telor ya iku panganan asli Betawi kang wis ana wiwit jaman biyèn sarta minangka panganan khas Jakarta.[1] Kerak telor iku pertalané "intip endhog" ing basa Jawa.

Panganan iki digawé saka beras ketan putih, endhog bèbèk utawa endhog pitik, ebi (urang garing), srundeng (parutan klapa kang disangan garing), brambang goreng sarta bumbu lombok abang, kencur, jae, mrica, uyah, lan gula pasir.[2] Kerak telor ora dimasak ing ndhuwur kompor nanging nganggo keren utawa anglo (basa Indonésia:tungku).[2] Ketan kang dianggo nggawé kerak telor iku kudu dikum dhisik kurang luwih sewengi suwéné.[3] Ketan iku dijupuk lan diratakake ing wajan panas, nanging ora nganggo lenga.[3] Sawisé iku, ditambahi srundeng lan bahan-bahan liyané.[3] Nalika nggawé kerak telor, wajan kang dianggo nggawé sadhéla-sadhéla diwolak-walik madhep keren. Iki dilakoni supaya kerak telor matenge rata.[2] Yèn wis garing lan mateng, kerak telor bisa disuguhake kanggo dipangan.[2]

Sajarah

Nalika jaman kolonial Walanda, kerak telor tau dadi panganan elit khas Betawi kang kawentar énak rasané.[1] Panganan iki disuguhake nalika ana pista lan hajatan gedhé para panggedhe jaman semana.[1] Saya suwé, kerak telor banjur dadi panganan kang langka lan mung ana nalika Pekan Raya Jakarta (PRJ).[1]

Cathetan suku

  1. ↑ a b c d "Kerak Telor". Diarsip saka sing asli ing 2012-08-30. Dibukak ing 2011-08-16.
  2. ↑ a b c d "Kerak Telor". Diarsip saka sing asli ing 2011-09-18. Dibukak ing 2011-08-16.
  3. ↑ a b c "Sejarah di balik Gurihnya Kerak Telor, Kuliner Khas Betawi". Diarsip saka sing asli ing 2020-02-24. Dibukak ing 2011-08-16.