Republiko India esas nun la maxim populoza lando de la mondo, kun plu kam 1,4 miliard habitanti[1], e la sepesma maxim vasta lando. Kun plura oficala lingui e centi di dialekti, diversa religii ed kulturi, multa granda urbi e plu kam 700 000 vilaji, India esas tre diversa lando. En nordal India parolesas lingui de la familio Indo-Europana, kontre ke en sud-India parolesas precipue Dravidana lingui.
Malgre l'impresiva gani en ekonomiala progreso dum recenta yari, fundamentala koncerni en India esas la duranta intermilitanta stando kun Pakistan pri Kashmir, la tropopulozeso, ekologiala dekado, ecesiva povreso, ed etniala ed religiala konflikti.
Cirkume 55 mil yari ante nun, l'unesma moderna homi arivis al Indiana subkontinento veninta de Afrika. Existas evidentaji pri homala habitado en la nuna stato Madhya Pradesh depos la petr-epoko, cirkume 30 mil yari ante nun. L'unesma permananta konstrukturi aparis cirkume 6000 aK. La maxim anciena civilizuro konocata esas la civilizuro de la valo dil Indus, cirkume 3400 yari aK. Ca civilizuro kreis importanta urbi, exemple Mohenjo-daro, Harappa, Dholavira, e Kalibangan, developis artizan-arto e forta komerco.
Sequinte, eventis tale nomizita periodo Veda, kande kreesis la fundamenti di Hinduismo. Anke la fundamenti di Budismo kreesis en India. La sistemo di kasti developesis dum ca epoko, e kreis hierarkio di sacerdoti, militisti e libera rurani, tamen exkluzis aborijena populi, judikanta lia labori kom "nepura".
Mohamedani komencis okupar Indiana subkontinento dum la 8ma yarcento, samatempe kam la nordo di India restis dividita inter tri imperii: Gurjara-Pratihara, l'imperio Pala, e la dinastio Rashtrakuta centre, weste e sude de la nuna India.
Segun la konstituco adoptita en 1950, India esas parlamentala e federalarepubliko, ed anke la maxim populoza liberala demokratio. Omna civitani evanta 18 yari o pluse darfas votar. La prezidanto esas chefo di stato di la lando, ed elektesas nedirete dal parlamento, por 5-yara periodo. La chefministro esas la chefo di guvernerio, ed elektesas da Lok Sabha (chambro di deptutati) inter la membri del partiso kun la maxim multa reprezentanti en la parlamento.[2]
Legifala povo konsistas ek duchambra parlamento. La supera chambro esas la konsilistaro di stati (Rajya Sabha) qua havas 243 membri, di qui 233 elektesas dal asemblitari de la stati e teritorii por 6-yara mandato, e la cetera 12 nominesas dal prezidanto. La Domo di Populo (Lok Sabha) havas 545 membri, qui elektesas direte dal populo por 5 yari, en singla elektala distrito.[2]
La maxim alta korto de la judiciala povo esas la Supera korto, qua havas 28 membri, inkluzite la chef-judiciisto. La membri de la Supera korto indikesas dal prezidanto, e servas til evar 65 yari.[2] Subordinita korti esas l'alta korti, la distriktala korti, e la laborala korti.[2]
La legaro di India influesis da Britaniana legaro. Existas separita legaro por Mohamedani, Kristani e Hindui. En 2019, Indiana parlamento komencis revizar lua kriminala legaro, qua kreesis dum Britanian epoko.
Geografio
India okupas granda parto dil Indiana subkontinento, qua separesis de la superkontinento Gondwana 75 milion yari ante nun e diplasis adnorde. En la punto ube la subkontinento kolizionis kun Azia formacesis la montaro Himalaya, la maxim alta montaro de la mondo. Himalaya formacas nordala frontieri di India. Monto Kangchenjunga, la 3ma maxim alta del mondo, jacas an la frontero inter India e Nepal. Ube olim existis maro dum milion yari ante nun, formacesis la valo dil fluvio Ganga.
Weste de la lando, an la frontiero kun Pakistan, jacas la stato Rajasthan, kovrata da dezerti. La basa tereni de la regiono cirkondesas da basa monti nomizita Dekkan Ghat. Ta monti inklinas aden streta litorala regioni.
Multa fluvii e riveri trairas la lando. Fluvio Ganga, longa de 2.478 km, fluas tra granda fertila plana lando en la centra parto. Fluvio Indus, de qua originis la nomo di la lando, naskas en India, trairas disputata teritorii en Kashmir, e debushas an la litoro di Pakistan, che Araba maro.
Klimato
Ordinare, la klimato di India influesas da la musono, kun koldeta vintri ed varmega someri sequita de du o tri pluvoza monati. Norde e centre de la lando, dumvintri, kolda venti veninta de Himalaya efektigas sikeso e koldeso. En la suda parto e en la litoro dil Araba maro, la klimato esas varma e humida dum la tota yaro.
L'ekonomio di India kreskis tre rapide en recent yari, quankam la quarimo de la habitantaro esas tre povra.
Demografio
Segun statistiki por yaro 2023, India havas 1 425 775 850 habitanti, esanta la maxim populoza lando de la mondo.[1] La maxim multa (72%) esas Indo-Ariani. Dravidiana populi esas 25%, Mongoloida etnii esas 3%, segun statistiki de 2000.[2]
L'oficala linguo di la lando esas Hindi parolata da 43,6%. Bengali parolesas da 8%, Mahrati parolesas da 6,9%, Telugu 6,7%, Tamil parolesas da 5,7%, Gujarati parolesas da 4,6%, Urdu parolesas da 4,2%, Kannada parolesas da 3,6%, Odia parolesas da 3,1%, Malayalan parolesas da 2,9%, Punjabi parolesas da 2,7%, Asamana parolesas da 1,3%, Maithili parolesas da 1,1%, e 5,6% parolesas altra lingui.[2]
La religio kun la maxim granda nombro di adepti esas Hinduismo, praktikata da 79,8% de la habitantaro. Mohamedani esas 14,2%, kristani esas 2,3%, Sikhi esas 1,7%, e 2% ne informis pri religio en 2011.[2]