Colombo
 Colombo esas la maxim populoza urbo di Sri-Lanka. Segun la demografiala kontado di 2011, ol havis 752 993 habitanti. Lua tota surfaco esas 37,31 km². Ol esas importanta portuala urbo ja konocita dal anciena komercisti 2.000 yari ante nun. La regiono koloniigesis dum la 8ma yarcento dal Araba komercisti. La nomo Colombo donesis en 1505 dal Portugalani, e probable devenas del anciena Sinhalana-vorto kolon thota, signifikante 'portuo an la fluvio Kelani'. Nun ol havas moderna edifici, exempleri pri kolonial arkitekturo, e ruini.[1] Geografio La reliefo di Colombo esas plana, kun kelka kolini e diversa kanali. An lua centro existas 65-hektara lago artificala, nomizita Beira. La mezavalora altitudo dil urbo esas 8 metri. Lua maxim basa punto jacas 1 metro sub la marala nivelo, kontre ke lua maxim alta punto jacas 119 metri super la marala nivelo.[2] La klimato dil urbo esas tropikala humida (Af segun la klimatala klasifikuro da Köppen), kun du musonala sezoni: de aprilo til mayo, e de septembro til novembro. La temperaturi esas varma dum la tota yaro, kun poka varii di temperaturo: la mezavalora temperaturo en aprilo, la maxim varma monato, esas 28,7°C, kontre ke la mezavalora temperaturi en decembro e januaro (vintro en norda misfero) esas 27,2°C. L'epoko maxim pluvoza iras de septembro til novembro. La mezavalora pluvo-quanto yarala esas 2397 mm. La maxim pluvoza monato esas oktobro, kun mezavalore 359,3 mm. Ne existas monato senpluva: la min pluvoza monato esas februaro, kun 77,4 mm. Referi
|
||||||||||||||||||||||||||||||||||||||||||||||||||||||||||
