Stella McCartney naceu en Londres,[1] onde creceu. O seu nacemento foi crítico porque tanto a súa nai como ela sufriron moitos problemas. Este traumático momento levou ao seu pai a pregar para que nacese "nas ás dun anxo", e esta expresión inspirou o nome da banda dos seus pais nos anos 70, Wings ("ás").[2][3] De nena, viaxou por moitos lugares nas xiras dos seus pais, xunto cos seus irmáns, a súa medio irmá máis vella Heather (adoptada legalmente por Paul), a súa irmá máis vella Mary, e o seu irmán máis novo James.
Stella admite que tivo unha infancia rutineira a pesar de que os seus pais eran famosos. Asistiu á escola pública de Sussex, onde foi vítima de acoso escolar,[4] a pesar de ser ela mema unha acosadora.[5]
Dende pequena estivo en contacto co mundo da moda. Aos trece anos xa confeccionaba a súa propia roupa e aos quince tivo o seu primeiro traballo relacionado coa moda facendo prácticas na casa Lacroix de París. Logo completou a súa formación nunha fundación de arte no Ravensbourne College of Design and Communication.[6][7]
Graduouse na Central Saint Martins College of Art and Design. Aos dezaoito anos comezou a traballar para a deseñadora Betty Jackson, que nunca permitía conceder favores ás elites. Stella foi a excepción. Nunca chegou tarde e era a última en marchar. Facía café, cosía botóns, levaba pedidos á oficina de correos e pasaba o ferro.[8]
Dende o comezo, nas súas tres primeiras coleccións, percibíronse grandes conceptos de xastre e un grande espírito na natureza e nunha feminidade atractiva. A súa primeira colección de graduación xa foi noticia e estivo na portada dos xornais. Toda a colección vendeuse a "Tokyo", unha tenda de Londres. Acto seguido, abriu o seu propio taller na moderna zona de Notting Hill Gate.[9] Os deseños foron licenciados a Browns, Joseph, Bergdorf Goodman e Neiman Marcus. A colección mostrouse xunto cunha canción escrita polo seu pai chamada "Stella May Day". En 1998 deseñou o vestido de noiva da súa irmá Mary para a súa voda co produtor de televisión Alistair Donald.
Alicia Keys vestida por Stella McCartney nos Aria Awards 2013 en Sydney
Pouco despois, en 1997, foi nomeada directora creativa da marca parisiense Chloé en París, sucedendo a Karl Lagerfeld e pasou catro anos á fronte. Cando deixou Chloé, a súa base de clientes volveuse máis nova e moderna e as vendas disparáronse. Finalmente, deixou a marca en 2001.[11]
Stella McCartney lanzou a súa propia firma de moda, que levaba o seu nome, nunha asociación con Kering como unha alianza comercial ao 50 por cento. Foi aquí onde mostrou a súa primeira colección na Semana da Moda de París en outubro de 2001. A marca lanzouse baixo o Grupo Gucci, actualmente PPR Luxury Group. "No grupo Gucci atopei un compañeiro con habilidades para facer deste negocio un éxito. Sempre quixen crear o meu propio selo e síntome preparado para o desafío", dixo Stella nun comunicado. De feito, e seguindo os seus principios de non usar tecidos animais, dise que rexeitou un traballo en Gucci, porque a marca adoraba as prendas e os accesorios de coiro.[12][6]
Ser filla do membro da banda dos BeatlesPaul McCartney e da fotógrafa activista polos dereitos dos animais Linda Eastman reflectiuse plenamente en moitos factores. De feito Stella foi vexetariana ao longo da súa vida. Tampouco usa ningún coiro nin peles nos seus deseños porque non quere renunciar aos seus principios, onde creceu, o campo e a granxa. Este feito tivo consecuencias porque ten menos opcións en canto a texturas e cores. As súas coleccións inclúen roupa de muller prêt-à-porter, accesorios, lencería, lentes, fragrancias e, finalmente, unha liña para nenos.[13]
As 33 tendas independentes que ten atópanse en lugares como o Soho de Manhattan, o Mayfair e Brompton Cross de Londres, o West Hollywood dos Ánxeles, o Palais Royal de París, Milán, Tokio, Shanghai e Pequín. As súas coleccións tamén se distribúen en máis de 70 países a través de 600 contas por xunto, incluíndo tendas especializadas e grandes almacéns, así como o envío a cen países en liña.
McCartney tamén deseñou para o cinema e para moitas celebridades de Hollywood.[14] O primeiro perfume que lanzou no 2003 chamouno "Stella". Foi nomeada doutora honoris causa pola Universidade de Dundee en marzo dese mesmo ano. En setembro de 2004, ademais da súa colección principal, tamén fixo unha asociación a longo prazo con Adidas, coa que fundou Adidas by Stella McCartney. A colección creceu ata expandir as distintas liñas de carreira, ximnasio, ioga, tenis, natación, deportes de inverno e ciclismo.[6]
En 2008 lanzou unha colección de lencería que reflectía as necesidades das mulleres modernas. No inverno de 2010 presentou o bolso "Falabella", un dos artigos máis vendidos da marca. Distinguiuse axiña polo detalle da cadea trenzada nos acabados. Tamén no mesmo ano presentouse a primeira colección Stella McCartney-Kids, que captaba o espírito e a enerxía dos máis pequenos. Esta liña de nenos, nenas e bebés, ía dende o nacemento ata os 14 anos.
Ao ano seguinte, en 2011, deu a coñecer a liña de lentes de sol que complementaban os seus desfiles. Tamén en 2011 foi incluída na lista do Daily Telegraph das mulleres máis poderosas do ano en Gran Bretaña.
O compromiso da deseñadora coa sostibilidade das coleccións cunha filosofía de responsabilidade, honestidade e modernidade agradeceuse constantemente. É ecoloxista, vexetariana e participou en moitas campañas contra o uso de peles de coiro e animais na fabricación de roupa.[15] Por iso, os seus zapatos son de vinilo ou plástico e os cintos e bolsas de rafia e téxtiles. Como ecoloxista, apoia ás organizacións Lynx e PETA para apoiar os dereitos dos animais e non usar materiais como coiro, pel, la ou seda.[16] Algúns dos seus deseños teñen frases que reflicten o seu respecto pola natureza, como unha das súas chaquetas para Adidas onde pon "apto para vexetarianos deportivos" nunha das mangas. Un par das súas botas de vinilo e Ultrasuede foron vendidas especificamente como "vegan-friendly", aínda que o seu uso de materiais sintéticos derivados do petróleo provocou críticas entre os ecoloxistas.[17] Foi mecenas da Vegetarian Society, organización dedicada a difundir os beneficios dunha dieta sen carne.[6][18]
Vida persoal
McCartney casou co editor británico Alasdhair Willis o 30 de agosto de 2003 na Mount Stuart House da illa de Bute. O seu vestido de noiva era unha versión actualizada do vestido da súa nai de 1969.[19] McCartney e Willis teñen catro fillos.[20]
McCartney ten unha medio irmá máis nova, Beatrice Milly McCartney, nada o 28 de outubro de 2003 do seu pai e a súa segunda esposa, Heather Mills.[21]
↑Miles, Barry; Badman, Keith, eds. (2001). The Beatles Diary After the Break-Up: 1970–2001 (reprint ed.). Londres: Music Sales Group. ISBN9780711983076.
↑Craven, Jo (11 de maio de 2011). "Stella McCartney bio". Vogue. Reino Unidos. Arquivado dende o orixinal o 16 de maio de 2008. Consultado o 27 de outubro de 2011.
↑"The Tatler List". Tatler. Arquivado dende o orixinal o 05 de febreiro de 2016. Consultado o 05 de abril de 2021.
.jpg)
