Roberto Olabe del Arco, nado en Salamanca o 5 de maio de 1996, é un futbolista español que xoga como centrocampista no Ibiza, da Primeira División RFEF. É fillo do antigo porteiro vasco Roberto Olabe.
Traxectoria
Real Sociedad
Naceu en Salamanca, na época na que seu pai, Roberto Olabe, defendía a portería do Salamanca. Criouse en Donostia e formouse como futbolista na canteira da Real Sociedad. Co equipo xuvenil do club disputou a edición inaugural da Liga Xuvenil da UEFA na tempada 2013/14, na que ademais foi subcampión da Copa de Campións Xuvenil, despois de perder a final contra o Real Madrid.[1]
Ao remate da súa etapa xuvenil xogou no Berio (segundo filial realista) ás ordes de Imanol Alguacil, así como no Sanse, primeiro filial do club, na Segunda División B.
Villarreal C
En 2015 incorporouse á estrutura do Vilarreal CF, co que xogou durante a tempada 2015/16 nas filas do Vilarreal C, na Terceira División.
Atlético de Madrid B
Para tempada 2016/17 fichou polo Atlético de Madrid B, tamén de Terceira. Co filial atlético logrou o ascenso a Segunda B ese mesmo ano, no que debutou ademais co primeiro equipo do Atlético de Madrid, nunha eliminatoria da Copa do Rei ante o Guijuelo na que xogou os minutos finais como substituto de Correa.[2]
Durante a tempada 2017/18 foi un habitual nas aliñacións titulares de Óscar Fernández na categoría de bronce, adestrando tamén de xeito frecuente co primeiro equipo, co que foi convocado a varios partidos da Copa do Rei e da Europa League. En marzo de 2018 o seu contrato foi renovado por tres tempadas máis.[3] En agosto de 2018 foi convocado para a Supercopa de Europa que o Atlético conquistou ante o Real Madrid, aínda que quedou no banco durante todo o partido.[4]
Cesión ao Extremadura
Ese mesmo mes anunciouse a cesión do centrocampista ao Extremadura UD, para xogar na Segunda División.[5] Habitual no once titular para os tres técnicos que ocuparon o banco durante a tempada, disputou un total de 34 partidos e marcou un gol na vitoria por 1-2 sobre o Deportivo da Coruña en Riazor que serviu para sacar o equipo estremeño dos postos de descenso.[6]
Eibar
Cesión ao Albacete
O 7 de xullo de 2019 fichou polo Eibar por catro tempadas,[7] aínda que na primeira delas saíu cedido ao Albacete Balompié, de Segunda.[8] Con todo, no club adestrado por Ramis non estivo á altura das expectativas e en xaneiro chegouse a un acordo para poñer fin á súa cesión.[9]
2ª cesión ao Extremadura
Pasou a segunda metade da tempada cedido no Extremadura, cumprindo así a súa segunda etapa no club.[10] Disputou a maioría de partidos restantes, pero o equipo de Manuel Mosquera acabou descendendo ao remate da campaña.
Cesión ao Tondela
Para a tempada 2020/21 formou parte do cadro de xogadores do Eibar, pero non chegou a debutar na Primeira División, participando só en dous encontros da Copa do Rei. O 17 de xaneiro de 2021 anunciouse a súa saída para xogar cedido no CD Tondela ata o final da tempada.[11] No equipo portugués tivo como técnico ao tamén donostiarra Pako Ayestarán e disputou un total de 17 encontros na Primeira Liga, 13 deles como titular.
Regresou a Eibar para a campaña 2021/22, pero Gaizka Garitano aliñouno só en tres encontros (un de liga e dous de Copa).
Alcorcón
O 31 de xaneiro de 2022 rescindiu o seu contrato co club vasco e ese mesmo día fichou polo Alcorcón ata o final da tempada.[12][13] No club amarelo recuperou protagonismo, disputando 15 encontros da Segunda División, 13 deles como titular, pero o equipo acabou descendendo.
Deportivo da Coruña
O 7 de xullo de 2022 anunciouse a súa fichaxe polo Deportivo da Coruña por dous anos.[14] Iniciou a tempada 2022/23 con pouco protagonismo no equipo de Borja Jiménez, que lle deu a titularidade no centro do campo a Bergantiños e Villares. Con todo, acabou sendo un fixo no once inicial durante a parte central da competición, antes de perder peso no equipo de novo no treito final. Xogou un total de 35 partidos co club galego, 26 deles como titular.[15] Non chegou a iniciar a segunda campaña do seu contrato, pois este foi rescindido no verán de 2023.[16]
Ibiza
Trala súa marcha da Coruña recalou nas Illas Baleares, onde fichou polo Ibiza, da mesma categoría.[17]
Selección española
Foi internacional coa selección española sub-17, coa que disputou tres encontros en 2012.
Vida persoal
É fillo do exfutbolista Roberto Olabe, que militou entre outros equipos no Salamanca e na Real Sociedad. É neto por parte materna de Alfonso del Arco, que foi o último presidente do Salamanca antes da desaparición do histórico club en 2013.[18]
Palmarés
- Atlético de Madrid
Notas
Véxase tamén
Ligazóns externas
|
|---|
4º na Primeira División RFEF |
|
_con_palla_e_corona.png){kind=small}
