Crocodiles
Álbum de Echo & the Bunnymen
Publicado	18 de xullo de 1980
Gravación	1980
Estudio(s)	Eden Studios, Londres; Rockfield Studios, Monmouth, Monmouthshire, Gales
Duración	37:03
Xénero(s)	post-punk
Selo(s)	Korova
Produtor	Bill Drummond, David Balfe, Ian Broudie
Cronoloxía
- Crocodiles Heaven Up Here (1981)
Na rede
[ editar datos en Wikidata ]
v c e

Crocodiles é o álbum de estrea da banda británica de post-punk Echo & the Bunnymen, publicado o 18 de xullo de 1980 no Reino Unido e o 17 de decembro nos Estados Unidos. O disco acadou o número 17 da lista británica de álbums. As súas cancións "Pictures on My Wall" e "Rescue" foran anteriormente editadas como sinxelos.

Gravado nos Eden Studios de Londres e nos Rockfield Studios preto de Monmouth, no País de Gales, Crocodiles foi producido por Bill Drummond e David Balfe, mentres que Ian Broudie encargárase xa da produción do sinxelo "Rescue". Tanto a música como a portada do traballo reflicten imaxes de escuridade e tristeza. O álbum recibiu recensións favorables na prensa musical, obtendo 4 de cinco estrelas nas revistas Rolling Stone e Blender.

Echo & the Bunnymen formouse en 1979 e orixinalmente estaba composto por Ian McCulloch (voz e guitarra rítmica), Will Sergeant (guitarra solista), Les Pattinson (baixo) e unha caixa de ritmos. Lanzaron o seu sinxelo de estrea, "The Pictures on My Wall", en maio de 1979 polo selo independente Zoo Records e a banda fichou despois por Korova, un selo subsidiario de WEA, onde foron convencidos para que contratasen un batería.^[1] Pete de Freitas uniuse posteriormente á banda, e a principios de 1980 gravaron o seu segundo sinxelo, "Rescue". O sinxelo foi gravado nos Eden Studios de Londres e producido polo ex-membro de Big in Japan Ian Broudie.^[2]

En xuño de 1980 seguiu unha xira británica antes de que a banda fose aos Rockfield Studios para gravar o seu álbum de estrea. Aínda que se falou que lle ofreceran ao cantante estadounidense Del Shannon facer a produción do álbum, este foi finalmente producido polo representante do grupo Bill Drummond e o seu socio comercial e teclista de The Teardrop Explodes David Balfe.^[3] A gravación do álbum só durou tres semanas, pero Pattinson quedou sorprendido pola natureza aburrida do proceso de gravación: "Había moito tempo de espera. Non entendín todas as partes de 'introducións' e 'edicións'".^[4]

Todos os temas copostos por Will Sergeant, Ian McCulloch, Les Pattinson e Pete de Freitas agás onde se indique.

• Adams, Chris (2002). Turquoise Days: The Weird World of Echo & the Bunnymen. Soft Skull. ISBN 1-887128-89-1. 
• Bell, Max (2003). Crocodiles (libreto do CD). Echo & the Bunnymen. Warner Strategic Marketing. 2564-61161-2.