A ADN polimerase alfa tamén chamada DNA polimerase alfa ou Pol α é un complexo encimático que se encontra en eucariotas, que está implicado na iniciación da replicación do ADN. O complexo da ADN polimerase alfa consta de 4 subunidades: POLA1, POLA2, PRIM1, e PRIM2.^[1]

A Pol α ten unha procesividade limitada e carece de actividade 3′ exonuclease para a corrección de erros. Deste modo, non é moi axeitada para copiar de forma precisa e eficiente longos moldes de ADN (a diferenza das Pol Delta e Epsilon). En lugar diso, ten un papel máis limitado na replicación. A Pol α é responsable da iniciación da replicación do ADN nas orixes de replicación (tanto na febra líder coma na retardada) e durante a síntese dos sucesivos fragmentos de Okazaki na febra retardada. O complexo da Pol α (complexo da pol α-ADN primase) consta de catro subunidades: a subunidade catalítica POLA1, a subunidade reguladora POLA2, e as subunidades primase pequena (PRIM1) e grande (PRIM2). Unha vez que a primase creou o cebador ou primer de ARN, a Pol α empeza a replicación elongando o cebador uns 20 nucleótidos.^[1]

• ADN polimerase

• DNA polymerase alpha Medical Subject Headings (MeSH) na Biblioteca Nacional de Medicina dos EUA.