Petriren Lehen Gutuna

Papiro 72 1 P 2:7-17 kopia goiztiarra daukana.

Petriren Lehen Gutuna edo 1 Petri (1 P) Bibliako Itun Berriko gutun katolikoetako bat da. Gutuna Petri Apostoluak Erroman K.o. 60 urtean idatzitakoa dela uste izan ohi da, egileak bere burua "Petri, Jesu Kristoren apostolu" aurkezten du.[1] Beste batzuk gutuna geroagokoa dela uste dute; haien iritziz, kristau-tradizio goiztiarraren hasieraren isla izan baino gehiago, tradizio haren osteko lan bat da, eta I. gizaldiaren eta II. gizaldiaren artean idatzitakoa dela uste dute.

Gutunaren testuak "Babiloniatik" idatzi zuela esan nahi duen adierazpen bat ekartzen du, seguru asko, Erroma adierazi nahi zuen. Gutuna erlijio-jazarpena jasaten ari ziren Asia Txikiko eliza batzuei idatzi zien.

Hartzaileak

1 P 1:1 txatalaren arabera, Ponto, Galazia, Kapadozia, Asia eta Bitiniako lurraldeetan atzerritar bezala sakabanaturik bizi zirenei idatzi zien. Lurralde haiek Asia Txikiko Erromatar Inperioko probintziak ziren. Ponto eta Bitiniak, hala ere, probintzia bakarra osatzen zuten. Halandaze, egile batzuen ustez, izenok eskualdeenak dira. Hala izanez gero, Efeso eta Ikonio inguruko eremuak ez zituzkeen barne hartuko. Gutuna argitaratu zenean, eskualdetako elizetan judu nahi ez-juduak partaide izango ziratekeen.[2]

Edukia

Sarrera (1 P 1:1-2) eta amaiera (1 P 5:12-14) bazter utzita, idaztankera inpertsonala da, ezelan ere benetako gutun batekoa. Bataioa sarri aitatzen denez, bereziki gutunaren hasieran, hartzaileak bataiatu berriak zirela uste izan ohi da, eta gutuna bataio-homilia bat izan zela. Homiliaz gain, gutunak lau ereserki eta katekesi-pasarte batzuk dauzka.

Egitura

  • Agurra (1:1-2)
  • Esker ona Kristorengandiko salbamenagatik (1:3-5)
  • Fededunen poza (1:6-9)
  • Salbamena profetek iragarri (1:10-12)
  • Santu izateko deia (1:13-21)
  • Bizi jaioberriei dagokienez (1:22-2:3)
  • Kristo harri bizia eta Jainkoaren herri berria (2:4-10)
  • Kristau-bizitza jentilen artean (2:11-12)
  • Agintariekin harremanak (2:13-17)
  • Esklaboen harremanak nagusiekin (2:18-25)
  • Senar-emazteen arteko harremanak (3:1-7)
  • Kristau-elkarteko barne-harremanak (3:8-12)
  • Zorionekoak zuzentasunagatik sufritzen dutenak (3:13-17)
  • Bataioaz Jesusen garaipenaren partaide (3:18-22)
  • Bekatuzko lehengo biziera baztertu (4:1-6)
  • Hurbil da azkena. Elkarte-bizitza (4:7-11)
  • Poztu erasoaldietan (4:12-19)
  • Elkarte-arduradunak (5:1-4)
  • Izan apal eta egon erne (5:5-11)
  • Azken agurrak (5:12-14)

Erreferentziak

  1. ↑ «1 P 1,1 - BIBLIJA.net - Biblia interneten» www.biblija.net (Noiz kontsultatua: 2021-05-04).
  2. ↑ (Ingelesez) Grudem, W.. (IVP 1988). «I Peter» Tyndale New Testament Commentaries. Inter-Varsity Press, 38 or..

Ikus, gainera

Kanpo estekak