René David - n. la 12-an de januaro 1906 en la 6-a arondismento de Parizo, Francilio, Francio, m. 84-jaraĝa la 26-an de majo 1990 en Le Tholonet, departemento Bouches-du-Rhône ("Riverbuŝoj de Rodano", okcitane Bocas de Ròse), en la regiono Provenco-Alpoj-Bordo Lazura, same Francio - estis franca juristo kaj universitata profesoro. Ekde 1929 - li tiam estis nur 23-jara - ĝis la dua mondmilito li estis universitata profesoro en la Alpa Universitato de Grenoblo, tiam en la milito servis kiel soldato, de 1945 ĝis 1968 estis profesoro pri kompara juro en la universitato Sorbonne de Parizo kaj sekve ĝis la emeritiĝo en 1976 estis profesoro en la Universitato Aikso-Marsejlo. En 1976, la jaro de sia emeritiĝo, li honoriĝis per la Erasma premio, ĉiujara premio donita de la estraro de la fondaĵo Praemium Erasmianum en Nederlando al individuoj aŭ institucioj kiuj faris esceptajn kontribuojn al kulturo, socio aŭ socia scienco en Eŭropo kaj la resto de la mondo.[1] Ĝi estas unu el la plej eminentaj premioj de Eŭropo. La premio estas nomita laŭ Erasmo de Roterdamo, siatempe ofte latine nomita Desiderius Erasmus, nederlanda renesanca humanisto.
Referencoj
