Sesso in testa
SuntLa Diana Tornetti (Pilar Velázquez) l'è na śuvnòta piutòst blina ch'l'è drē a laureàr-'s in suciulugìa. Adès la gh'à sōl da dascórar dla téśi ch'l'à preparâ cun la cumisiòṅ ch'la gh'à a cap un presidènt a la bòna (Lino Banfi), un prevòstar stralunâ (Gastone Pescucci) e àtar mémb'r incóra (Didi Perego e Marcello Bonini Olas). L'argumènt al scòta dimóndi esénd su la prustitusiòṅ in Itàglia e la studènta, 'd acòrd c'n al sò muróś (Gino Santercole), la s è preparàda bèṅ esénd ch'l'iva decìś ad far la sòcla dabòṅ par tri méś. La ragàsa la cònta ch'a gh'è di óm (Giuseppe Terranova) ch'i gh càtan gust a far sès cun dal putàni vistìdi da sōri, di masć pîṅ 'd mùscui ch'i pàran Tarzan (Salvatore Billa) ch'i vōlan ch'a s dróa la scùria sèg, di mat (Jimmy il Fenomeno) ch'i s tìr'n indrē quànd i védan che lē la gh'à la pasra, di curióś ch'i guàrdan dal lèśbichi far sès in dal mèntar ch'i s sèntan di pui ciusàr, di mànager (Oreste Lionello) ch'i gh'aṅ présia 'd gusàr par via di sò impégn e che pò i n sànan gnanc s'i 'l aṅ fat dabòṅ, di mafióś cuma Frank Innamorato (Aldo Giuffrè) ch'i pàran ch'i gh dàg'n a la granda mo che invéci i gh'aṅ al mâł dla lumàga, un pàdar (Gigi Ballista) ch'al paga dal rój a sò fiōl chichèṅ par giustàr-al ma i gh'ànan sucès sōl qvéli vistìdi da óm, un pulìtig (Tino Scotti) ch'al ciùla gl'amànti in 'n albêrg ma ch'al gh'à da far i cònt cun na mujēr sicigliàna dimóndi gelóśa che lò al ciàma la “Teróna” (Liliana Chiari), un futógrafar tedésc (Luigi Leoni) ch'al tira śò di mudèi par far védar tut al puśisiòṅ dal sès cuma qvéla dal misiunàri che però la n è più 'd mòda fra i śōvan e 'n cumendadōr (Mario Carotenuto) ch'al la gusa faghénd finta ch'la sia sò fiōla. Culegamènt estéran |
|||||||||||||||
