Paulie - Il pappagallo che parlava troppo
«
Lò 'l dascór cun tut.»
(Tagline dal film)
Custâ vint-a-tri migliòṅ ad dòlar, al film al 'n à pò fat sù dagnóra vint-sèt. SuntMisha Vilyenkov (Tony Shalhoub) 'l è 'n imigrâ rus ch'al lavóra cuma óm dal pulisìi in un laburatòri americàṅ ch'al fà di esperimènt su 'l bèsti. Na sira chi lò 'l cata 'n papagàl in na gàbia dla strutùra e 'l taca a dascórar sèg dgénd ch'al s sènt śò parchè 'l è da par lò. A surpréśa 'l uśèl al taca a ciacaràr sèg esénd ch'al capìs incòśa anc se pò, davànti a di àtar, al tîṅ invéci 'l bèc sarâ. Misha al gh cònta ch'in Rùsia 'l éra 'n prufesōr universitàri 'd létri e ch'adès al s è ardùt a far di lavōr da pôc par campàr. A salta sù 'l papagàl ch'al gh diś 'd ciamàr-as Paulie e pò 'l taca a dascórar dla sò vita. Rigalâ péna nâ a na putìna ch'la tartàja da spés ciamàda Marie Alweather (Hallie Kate Eisenberg), Paulie 'l à imparâ a dascórar stand sèg méntar la fava di eśercìsi. Al ròbi i andàvan bèṅ fra lōr dū in fiṅ tant che sò pàdar Warren (Matt Craven) 'l è turnâ a cà da suldâ. Cardénd ch'la bèstia la fus 'n ustàcul par la carsùda sana dla putìna, e dòp 'n incidènt in du la Marie l'à risćiâ la vita, 'l óm 'l iva decìś 'd casàr-al via cunvinsénd sò mujēr, la Lila (Laura Harrington), a far sénsa d'l uśèl. A 'l inìsi Paulie 'l éra finî in un banc di pégn, in du 'l pasàva 'l sò tèmp a ufénd'r i cliènt, pò 'l éra stâ cumprâ da na védva ch'la fava l'artìsta, l’Ivy (Gena Rowlands). Chi lē, decìśa a jutàr al papagàl a catàr incóra la sò amìga Marie ch'in cal méntar l'iva spatinâ cun la sò famìja a Los Angeles, la 'l scaròsa in fiṅ là ma pò la pèrd la vista esénd vècia e malàda. Paulie 'l armàgn sèg in fiṅ a la sò mòrt, pò 'l cuntìnua 'l viàś da par lò. Culegamènt estéran |
|||||||||||||||||
