Фама Фаміч Мажэйка
Дата нараджэння	7 кастрычніка 1936(1936-10-07)
Месца нараджэння	Скураты, Квасевіцкі сельсавет, Івацэвіцкі раён, Брэсцкая вобласць, БССР, СССР
Дата смерці	16 кастрычніка 2018(2018-10-16) (82 гады)
Грамадзянства	Беларусь
Род дзейнасці	навуковец
Месца працы	Інстытут агульнай і неарганічнай хіміі
Навуковая ступень	доктар хімічных навук (1989)
Навуковае званне	член-карэспандэнт НАН Беларусі (1991)
Альма-матар	БДУ (1959)
Прэміі

Фама Фаміч Мажэйка (нар. 7 кастрычніка 1936, в. Скураты, Івацэвіцкі раён, Брэсцкая вобласць — 16 кастрычніка 2018) — беларускі хімік. Член-карэспандэнт Нацыянальнай акадэміі навук Беларусі (1991), доктар хімічных навук (1989).

Скончыў Белдзяржуніверсітэт (1959).

З 1959 года малодшы навуковы супрацоўнік, старшы інжынер, галоўны інжынер, старшы навуковы супрацоўнік Інстытута агульнай і неарганічнай хіміі АН БССР.

У 1980—1989 гадах намеснік дырэктара па навуковай рабоце, адначасова загадчык лабараторыі. З 1989 года загадчык аддзела, з 2004 года загадчык лабараторыі Інстытута агульнай і неарганічнай хіміі Нацыянальнай акадэміі навук Беларусі^[1].

Дзяржаўная прэмія БССР (1990) за распрацоўку і ўкараненне тэхналогіі вытворчасці калійных угнаенняў з палепшанымі фізічнымі і аграхімічнымі ўласцівасцямі.

Навуковыя даследаванні ў галіне калоіднай хіміі і фізіка-хімічнай механікі. Распрацаваў навуковыя асновы рэгулявання калоідна-хімічных уласцівасцяў глініста-солевых дысперсій, якія ўтвараюцца пры вытворчасці калійных угнаенняў. Устанавіў заканамернасці і асаблівасці ўзаемадзеяння павярхоўна-актыўных рэчываў з гліністымі мінераламі ў канцэнтраваных растворах электралітаў. Укараніў на ПА «Беларуськалій» новыя рэагенты, якія павышаюць эфектыўнасць флатацыйнага працэсу атрымання калійных угнаенняў і паляпшаюць іх якасць. Вывучыў механізм атрымання кандэнсацыйна-крышталізацыйных структур у калійных угнаеннях. Распрацаваў новыя спосабы атрымання незлёжваюшчыхся, непыляшчых мінеральных угнаенняў і больш экалагічна чыстых, павольнарастваральных, грануляваных угнаенняў, спосабы атрымання з глініста-солевых адходаў вытворчасці калійных угнаенняў, каштоўных для народнай гаспадаркі матэрыялаў, а таксама эфектыўныя рэагенты-пылагасільнікі.

Аўтар больш за 520 навуковых прац, у тым ліку манаграфіі, 198 вынаходак.

• Физикохимия селективной флотации калийных солей. Мн., 1983 (в соавт.).
• Производство, использование минеральных удобрений в БССР и проблемы охраны окружающей среды. Мн., 1988 (совм. с Н. П. Крутько).

• Фама Фаміч Мажэйка ў базе даных «История белорусской науки в лицах» Цэнтральнай навуковай бібліятэкі імя Якуба Коласа НАН Беларусі (руск.)