Маладзечанскі гандлёва-эканамічны каледж Белкаапсаюза
Дата заснавання	1959
Тып	каледж
Размяшчэнне	Маладзечна
Адрас	222310, Мінская вобласць, г. Маладзечна, Цэнтральная плошча, 1
mtec.by

Маладзечанскі гандлёва-эканамічны каледж Белкаапсаюза — сярэдняя спецыяльная адукацыйная ўстанова ў г. Маладзечна, Мінская вобласць. Размешчаны па адрасе Цэнтральная плошча, 1.

1 верасня 1959 г. у будынку Маладзечанскага аблспажыўсаюза пачаў сваю дзейнасць Маладзечанскі кааператыўны тэхнікум. У тэхнікуме рыхтавалі бухгалтараў, эканамістаў, статыстаў на дзённым (150 чалавек) і завочным (240 чалавек) аддзяленнях. У сувязі з ліквідацыяй Маладзечанскай вобласці будынак аблспажыўсаюза ў 1960 годзе перададзены тэхнікуму^[1].

У 1961 годзе стары навучальны корпус пераабсталяваны пад інтэрнат, у якім пражывалі 270 навучэнцаў. У 1961 годзе пабудаваны навучальны корпус з 21-й навучальнай аўдыторыяй, бібліятэкай, навучальнымі кабінетамі. У 1963 годзе кааператыўны тэхнікум быў пераназваны ў Маладзечанскі ўлікова-планавы тэхнікум^[1].

У 1965 годзе пры тэхнікуме створана Міжрэспубліканская аднагадовая інструктарска-рэвізорская школа, у якой вялася падрыхтоўка спецыялістаў з ліку выпускнікоў тэхнікума, якія прапрацавалі не менш як два гады ў сістэме спажывецкай кааперацыі. Школа функцыянавала да 1986 года. За перыяд свайго існавання ў ёй было падрыхтавана 1565 выпускнікоў (318 інструктараў і 1247 рэвізораў)^[1].

У 1967 годзе ўведзены ў эксплуатацыю новы інтэрнат на 632 месцы, у якім размясціліся сталовая на 120 месцаў, пункт аховы здароўя, чытальная зала, пакой адпачынку^[1].

У 1968—1975 гадах пры тэхнікуме існавала вучылішча па падрыхтоўцы інвентарызатараў^[1].

У 1971 годзе створаны ўніверсітэт грамадскіх прафесій, у якім мелася 9 факультэтаў і штогод навучалася каля 500 чалавек^[1].

У 1983 годзе ўведзена ў эксплуатацыю прыбудова спартыўнага комплексу, якая злучыла навучальны корпус з інтэрнатам. У ёй размешчаны 2 спартыўныя залы агульнай плошчай 810 м² і 5 навучальных аўдыторый^[1].

У 1986 годзе на базе тэхнікума адкрыта прафесійна-тэхнічнае вучылішча па падрыхтоўцы прадаўцоў з планам прыёму 90 чалавек. У 1993 годзе тэхнікум і вучылішча ператвораны ў навучальна-вытворчы комплекс «ПТВ-тэхнікум». У 2000 годзе «ПТВ-тэхнікум» пераназваны ва ўстанову адукацыі «Маладзечанскі гандлёва-эканамічны каледж» Белкаапсаюза^[1].

• Афіцыйны сайт