Егіпецкі мост (руск.: Еги́петский мост) — аўтадарожны рамны мост цераз Фантанку ў Адміралцейскім раёне Санкт-Пецярбурга, злучае паміж сабой Пакроўскі і Безыменны астравы. Мост з’яўляецца помнікам гісторыі і культуры федэральнага значэння. Перасякае Фантанку па восі Лермантаўска праспекта. Вышэй па цячэнні ракі знаходзіцца Чырвонаармейскі мост, ніжэй — Англійскі мост. Бліжэйшая станцыя метрапалітэна (1,1 км) — «Балтыйская».
Мост атрымаў сваю назву з-за своеасаблівага афармлення: у архітэктуры ланцужнога моста адлюставалася ўласцівая для пачатку XIX стагоддзя павышаная цікавасць да мастацтва Старажытнага Егіпта. У перыяд праектавання і будаўніцтва ў афіцыйных дакументах мост называўся Вялікі ланцуговы мост або Праезджы ланцуговы мост паміж Ізмайлаўскім і Калінкінскім мастамі. З 1828 да 1836 года — Новы ланцуговы мост, з 1836 да 1867 — Егіпецкі ланцуговы мост, з 1867 года — Егіпецкі мост.