PROFILPELAJAR.COM

George McFarland
Vida
Nacimientu	Dallas, 2 d'ochobre de 1928
Nacionalidá	Estaos Xuníos
Llingua materna	inglés
Muerte	Grapevine (es) , 30 de xunu de 1993 (64 años)
Sepultura	Cementerio Estatal de Texas (es)
Causa de la muerte	infartu de miocardiu
Fíos/es	3
Estudios
Llingües falaes	inglés
Oficiu	actor, actor de cine, actor infantil
Premios	ver Estrella del Paséu de la Fama de Hollywood ;
IMDb	nm0568757

George "Spanky" McFarland (2 d'ochobre de 1928, Dallas – 30 de xunu de 1993, Grapevine ^(es) ) foi un actor d'Estaos Xuníos conocíu poles sos interpretaciones na serie de curtios cómicos de Our Gang nes décades de 1930 y 1940. Los curtios de La Peada fixéronse populares darréu en siendo emitíos pola televisión sol nome de "The Little Rascals".

Entamos

El so nome completu yera George Robert Phillips McFarland, y nació en Colorado (Texas). Los sos padres yeren Robert Emmett y Virginia McFarland, y tuvo tres hermanos, Thomas ("Tommy," qu'intervieno en dellos capítulos de La Peada como "Dynamite"), Amanda, y Roderick ("Rod").

Antes de formar parte de La Peada, Buddy, como yera llamáu pola so familia, yera modelu de ropa infantil nunos grandes almacenes de Dallas, amás d'apaecer en valles publicitaries y n'anuncios impresos faciendo publicidá pa Wonder Bread. Estes actividaes dieron a "Buddy" experiencia enantes de trabayar frente a la cámara, y valiéron-y una imaxe pública de neñu adorable.

La Peada

En xineru de 1931, en respuesta a un anunciu de los Estudios Hal Roach de Culver City (California) nel que se buscaben fotografíes de "neños guapos," la tía de Spanky, Dottie, mandó delles instantánees del neñu. Llueu recibieron una invitación pa faer una prueba, empecipiándose asina la carrera de McFarland.^[3] Partes de la prueba pueden trate nel episodiu de La Peada rodáu en 1932 y tituláu Spanky.

Según el mesmu actor, el so llamatu, "Spanky", foi-y puestu por un periodista de Los Angeles. L'usu del llamatu en posteriores actividaes o negocios foi garantizáu n'unu de los contratos roblaos col so estudiu.^[3]

Tres el so descubrimientu a los trés años d'edá, convirtióse instantáneamente nun miembru clave de la serie La Peada, según nuna estrella de Hollywood. Nos sos primeros filmes vése-y como un neñu pequeñu ensin pelos na llingua y que sigue al restu del grupu a remolera. La so habilidá robando escenes llamó l'atención, y en 1935 yera'l líder de facto del grupu, de cutiu empareyáu con Carl "Alfalfa" Switzer, y siendo siempres el so personaxe'l más creativu.^[3] El personaxe de Switzer llegó a robar tantes escenes como faía'l del mozu McFarland, y los padres de dambos mozos aldericaben constantemente sobre'l so tiempu en pantalla y los sos salarios.^[4]

La única película de llarga duración protagonizada por Spanky McFarland foi'l títulu de 1936 producíu por Hal Roach Xeneral Spanky, un intentu ensin ésitu d'afaer la serie de La Peada a los llargumetraxes. Tamién trabayó como actor xuvenil en munches producciones ayenes a Roach, ente elles la comedia de Bert Wheeler y Robert Woolsey Kentucky Kernels y dos títulos de Fritz Lang rodaos na década de 1940.

Tres el curtiu de 1938 de La Peada tituláu Came the Brawn, McFarland se "retiró" del grupu, empecipiando una xira d'actuaciones.^[5] A mediaos de 1938 Hal Roach vendió la unidá de La Peada a Metro-Goldwyn-Mayer, qu'empezó a buscar un nuevu "líder del equipu" al estilu de Spanky, y que remató recontratando a McFarland. L'actor siguió nes producciones de La Peada hasta la so última actuación na serie, nel episodiu Unexpected Riches, en 1942 y con trece años d'edá.^[3]

Últimos años

En 1952, a los 24 años d'edá, McFarland entró na Fuercia Aérea de los Estaos Xuníos. Tres la so vuelta a la vida civil, el so indeleble encasillamiento como "Spanky" torgó-y atopar trabayu nel mundu del espectáculu. Por ello hubo d'aceptar otru tipu de trabayos, ganándose la vida nuna planta de bébores, nun puestu d'hamburgueses y nuna fábrica de xelaos.

A finales de la década de 1950, cuando les comedies de La Peada afaraben al ser emitíes per televisión, McFarland presentó un show infantil, "Spanky's Clubhouse," na cadena televisiva KOTV de Tulsa, Oklahoma. Nel programa actuaron celebridaes como James Arness, y emitió curtios de los Little Rascals.^[3]

Tres esi periodu, siguió con ocupaciones de diversa índole, como vender vinu, trabayar nun restorán y nun night club, y vender electrodomésticos y muebles. Tamién foi vendedor de la empresa Philco Corporation, na cual llegó al puestu de direutor nacional de ventes. Tres lo qu'él describía como'l so "semi-retiru," Spanky emprestó'l so nome y la so fama pa collaborar en xeres benéfiques, principalmente participando en torneos de golf, celebrándose un tornéu benéficu col so nome a lo llargo de 16 años en Marion, Indiana.^[3]

McFarland siguió con actuaciones personales y caméos nel cine y na televisión, incluyendo una actuación nel programa The Tonight Show starring Johnny Carson. La so última actuación televisiva tuvo llugar en 1993 nel episodiu de la serie Cheers tituláu "Woody Gets An Election".

Fallecimiento

George McFarland finó en Grapevine, Texas, por causa de un paru cardiaco'l 30 de xunu de 1993. Tenía 64 años d'edá. Los sos restos fueron incineraos.

En xineru de 1994, y a títulu póstumu, McFarland convirtióse, xunto a Jackie Cooper, n'unu de los dos únicos miembros de La Peada compensaos con una estrella nel Paséu de la Fama de Hollywood, nel so casu nel 7095 de Hollywood Boulevard.

Filmografía

McFarland actuó como “Spanky” en 95 títulos de Our Gang ente 1932 y 1942. Amás participó en:

One Track Minds (1933), como un pasaxeru de tren.
Day of Reckoning (1933), como Johnny Day.
The Cracked Iceman (1934), como un estudiante.
Miss Fane's Baby Is Stolen (1934), como Johnny Prentiss.
Kentucky Kernels (1934), como Spanky.
Here Comes the Band (1935), como Billy Lowry.
O'Shaughnessy's Boy (1935), como Joseph "Stubby" O'Shaughnessy (de neñu).
The Trail of the Lonesome Pine (1936), como Buddie Tolliver.
Peck's Bad Boy with the Circus (1938), como Pee Wee.
Katnip Kollege (1938) (voz, ensin creitos).
I Escaped from the Gestapo (1943), como Billy.
Seeing Hands (1943) (ensin creitos).
Cowboy and the Senorita (1944) (ensin creitos).
The Woman in the Window (1945) (ensin creitos).
Spanky's Clubhouse (década de 1950), presentador.
The Aurora Encounter (1986), como'l gobernador.
Cheers, como él mesmu, nel episodiu de 1993 “Woody and the Election”.

Referencies

Jackie Cooper (1982). Please Don't Shoot My Dog: The Autobiography of Jackie Cooper. New York: Penguin Putnam. ISBN 0-425-07483-8.
Ramsey, Steve. Our Gang Online. Ramseyltd.com version of site as it existed on August 3, 2002 using the Wayback Machine on March 10, 2005. (Appears to be back online a/o 10/21/07).

↑ ^1,0 ^1,1 Afirmao en: SNAC. Identificador SNAC Ark: w6jn6pmz. Apaez como: George McFarland. Data de consulta: 9 ochobre 2017. Llingua de la obra o nome: inglés.
↑ Afirmao en: Find a Grave. Data de consulta: 11 xunu 2024. Llingua de la obra o nome: inglés.
↑ ^3,0 ^3,1 ^3,2 ^3,3 ^3,4 ^3,5 Leonard Maltin and Bann, Richard W. (1977, rev. 1992). The Little Rascals: The Life and Times of Our Gang, p. 118. New York: Crown Publishing/Three Rivers Press. ISBN 0-517-58325-9
↑ Leonard Maltin and Bann, Richard W. (1977, rev. 1992). The Little Rascals: The Life and Times of Our Gang, p. 178-180. New York: Crown Publishing/Three Rivers Press. ISBN 0-517-58325-9
↑ http://theluckycorner.com/rmt/166.html