El FC Zürich foi fundáu por Hans Gamper el 1 d'agostu de 1896 de la fusión del FC Turicum, el FC Excelsior y el FC Viktoria. Nos sos primeros años, amás del fútbol, el club desenvolvió otres práutiques deportives como'l boxéu o'l balonmano.
El so primer títulu de lliga llegó en 1902. En 1924 conquistaba'l segundu. La temporada 1933/34 el Zürich foi colista de la Nationalliga A y baxó a segunda división, onde permaneció siete años hasta recuperar la categoría. Darréu tornaría a segunda división en curtios periodos (1946–1948 y 1957–1958).
Tamién nesta dómina'l club algamó los sos meyores resultaos nes competiciones europees. Llegó a les semifinales de la Copa d'Europa de 1964 depués d'esaniciar al Galatasaray y el PSV Eindhoven, siendo finalmente posáu pol Real Madrid. Nuevamente algamó les semifinales de la máxima competición continental la temporada 1976/77 en ganando al Rangers y el Dynamo Dresden, pero nun pudo superar al Liverpool. Coles mesmes, llegó a los cuartos de final de la Copa de Feries 1967/68 en superando a clubes de gran tradición europea como'l FC Barcelona, el Nottingham Forest o'l Sporting de Lisboa. El so meyor rexistru na Recopa d'Europa foi llegar a la ronda de cuartos, la temporada 1973/74.
FCZ vs. GCZ: El Derby de Zúrich en 2009.
Mientres los años ochenta fíxose habitual que'l Zürich terminara la lliga na zona media de la tabla, hasta que finalmente perdió la categoría al términu de la temporada 1987/88. Fueron necesarios dos años na Nationalliga B pa poder tornar a la primer división.
La temporada 1998/99 torna a les competiciones europees, tres 15 años d'ausencia. Participa na Copa de la UEFA y consigue superar cuatro rondes, pa cayer n'octavos de final contra'l AS Roma.
Nel añu 2000 volvió saborguiar un títulu al conquistar la Copa de Suiza na tanda de penaltis contra'l Lausanne Sports. Repite títulu en 2005, nesta ocasión en ganando na final al FC Luzern. Al añu siguiente consigue conquistar la lliga, 25 años dempués, gracies a un memorable gol d'Iulian Filipescu nel tiempu añadíu del postreru partíu de la temporada.
La siguiente temporada revalidó'l títulu lligueru con una victoria por 2-0 ante'l so clásicu rival, el Grasshoppers, nuevamente na última xornada.
Na temporada 2015-16 significó'l so descensu a la Challenge League en terminando décimu y postreru na tabla. Sicasí llogró llograr la Copa de Suiza en ganando al F. C. Lugano na final, y qu'amás-y dexara tener presencia na próxima UEFA Europa League.
El FC Zürich apuesta los sos partíos de llocal nel estadiu Letzigrund, construyíu nel añu 1925. En xineru de 2005, la UEFA aprobó los planes pa la reconstrucción del estadiu de cara a la Eurocopa 2008. Nesti recintu apostáronse 3 alcuentros de dicha competición.
Ente agostu de 2006 y agostu de 2007, dada la remodelación del estadiu, el FC Zürich tuvo que xugar de llocal nel estadiu Hardturm, propiedá del so gran rival ciudadanu, el Grasshopper-Club Zürich.
El nuevu estadiu foi inauguráu'l 30 d'agostu de 2007. El 23 de setiembre d'esi añu, el FC Zürich y el Grasshopper xugaron el primer partíu de fútbol tres la reconstrucción. La capacidá actual ye de 25.000 pa partíos de fútbol, 30.000 pal atletismu y 50.000 pa conciertos.
