PROFILPELAJAR.COM

El Salvador
	estáu soberanu
bandera d'El Salvador	escudu d'El Salvador
Lema nacional	«Dios, Unión, Libertad»
Himnu nacional	Himnu Nacional de El Salvador;
Alministración
Nome oficial	El Salvador (es); la République du Salvador (fr)
Capital	San Salvador
Presidente d'El Salvador	Nayib Bukele (dende 1r xunu 2019)
Presidente d'El Salvador	Nayib Bukele (dende 1r xunu 2019)
Llingües oficiales	castellanu
División	ver Departamento de Ahuachapán (es) , Departamento de Cabañas (es) , Departamento de Chalatenango (es) , Departamento de Cuscatlán (es) , Departamento de La Libertad (es) , Departamento de La Paz (es) , Departamento de La Unión (es) , Departamento de Morazán (es) , Departamento de San Miguel (es) , Departamento de San Salvador (es) , Departamento de San Vicente (es) , Departamento de Santa Ana (es) , Departamento de Sonsonate (es) y Departamento de Usulután (es) ;
Rellaciones diplomátiques	ver España ; Chile ; Uruguái ; Taiwán ; Méxicu ; Estaos Xuníos ; Xeorxa (17 mayu 1999); Alemaña ; República Popular China ; Australia ; Kosovu ; ;
Miembru de	ver Organización de les Naciones Xuníes (24 ochobre 1945); Organización Mundial del Comerciu (7 mayu 1995); Bancu Internacional de Reconstrucción y Fomentu (14 marzu 1946); Asociación Internacional de Fomentu (23 abril 1962); Corporación Financiera Internacional (20 xunetu 1956); Organismu Multillateral de Garantía d'Inversiones (20 avientu 1991); Centru Internacional d'Arreglu de Diferencies Relatives a Inversiones (5 abril 1984); Organismu pa la Prohibición de les Armes Nucleares n'América Llatina y el Caribe ; Banco Centroamericano de Integración Económica (es) ; Mercado Común Centroamericano (es) (3 xunetu 1961); Interpol (8 avientu 1959); Organización pa la Prohibición d'Armes Químiques (29 abril 1997); UNESCO (28 abril 1948); Xunión Postal Universal (1 abril 1879); Xunión Internacional de Telecomunicaciones (12 ochobre 1927); Organización de los Estaos Americanos (1948); Organización Internacional de Proteición Civil (30 avientu 1985); Organización Meteorolóxica Mundial (27 mayu 1955); Organización Mundial de la Salú ; Organismo Internacional Regional de Sanidad Agropecuaria (es) ; Organización Mundial d'Aduanes (7 xunetu 2005); ;
Xeografía
Coordenaes	13°40′08″N 88°51′58″W / 13.66889°N 88.86611°O
Superficie	20742 km²
% agua	1.5
Costes	307 km
Llenda con	545 km
Puntu más altu	Cerro El Pital (es)
Puntu más baxu	Océanu Pacíficu
Demografía
Población	6 029 976 hab. (2024)
Densidá	290,71 hab/km²
Xentiliciu	salvadorianu (masculín singular); salvadoriana (femenín singular)
Esperanza de vida	73,512 años
IDH	0,675 (2021)
Tasa de fertilidá	1,931 (2014)
Economía
Moneda	dólar de los Estaos Xuníos y Bitcoin
PIB nominal	29 451 240 000 $ (2021)
Bancu central	Banco Central de Reserva de El Salvador (es)
Más información
Dominiu d'Internet	.sv
Códigu telefónicu	+503
Códigu ISO	222 / SLV / SV
Estaya horaria	UTC−06:00 y America/El_Salvador (en)
	elsalvador.travel…

El Salvador ye un país de clima tropical allugáu n'América Central, con una población d'aproximadamente 6,8 millones d'habitantes. Darréu de la so estensión territorial (21.041 km²) tien la densidá poblacional más alta d'América continental.

Historia

Na dómina precolombina l'actual territoriu salvadorianu tuvo habitáu por distintes etnies indíxenes, destacando los pipiles, una población d'orixe náhuat qu'ocupó la rexón occidental y central del territoriu y los lencas que poblaron la zona oriental del país. Pero'l dominiu más estensu hasta la conquista Española foi'l del reinu de Cuzcatlán.

Conquista, Colonia ya Independencia

Los conquistadores españoles, encabezaos por Pedro de Alvarado, al par del so hermanu Gonzalo, cruciaron el ríu Paz ente los años 1524-1525. Aportaron dende la zona qu'entiende l'actual república de Guatemala depués de participar na conquista de Méxicu. Mientres la colonia, El Salvador formó parte de la Capitanía Xeneral de Guatemala, tamién conocida como Reinu de Guatemala. El territoriu salvadorianu tuvo estremáu nes Alcaldíes Mayores de Sonsonate y San Salvador, siendo esta postrera alzada como Intendencia a finales del sieglu XVIII.

En 1811 y 1814 produciéronse importantes alzamientos contra'l dominiu español qu'espresaron la molición independentista de los criollos. Finalmente, les naciones centroamericanes consiguieron la so independencia d'España, el 15 de setiembre de 1821. Dende'l 5 de xineru de 1822, les provincies de Centroamérica, salvo la oposición de la élite salvadoriana ya intelectuales guatemalianos, integráronse al Primer Imperiu Mexicanu, hasta'l 19 de marzu de 1823, cuando Agustín de Iturbide abdica ante'l congresu.

Dómina de la Federación Centroamericana

Nel periodu que siguió a la independencia, El Salvador y los demás países centroamericanos intentaron caltener la unión heredada de la colonia y crearon la República Federal de Centroamérica, una federación que s'eslleió en 1839. En 1851 El Salvador sufre'l so más significativa derrota militar dende la so independencia, la Batalla de l'Arada. Depués de la disolución de la Unión asocedió un periodu de braceos ente lliberales y conservadores que s'enllargó hasta 1871. Mientres esti periodu, decayó el cultivu del añil ya introducióse el del café. Ente 1871 y 1931 asocediéronse los gobiernos lliberales que favorecieron los intereses de la naciente élite amestada al cultivu del café. En 1882, mientres la presidencia de Rafael Zaldívar, l'Asamblea Llexislativa decretó l'abolición de les tierres comunales y ejidales, que fueron vendíes a particulares, lo que provocó un cambéu sópitu na tenencia de la tierra.

Dómina del autoritarismu militar

En 1929, la economía del país entró en crisis, de resultes de la cayida de los precios del café nel mercáu internacional. En 1931, el Xeneral Maximiliano Hernández Martínez, llegó al poder tres un golpe d'estáu contra'l presidente civil Arturo Araujo. Martínez, estableció un gobiernu ultraconservador y autoritariu y reprimió col exércitu una sulevación de llabradores ya indíxenes nel occidente del país, lo que resultó en muerte de miles de persones. El númberu de víctimes mortales d'estos fechos, entá s'alderique. Les cifres de muertos, difieren según los autores, y van dende 7.000 hasta 30.000 persones. Los historiadores inda alderiquen la influencia de los miembros del Partíu Comunista Salvadoreñu na insurrección y del dirixente comunista Farabundo Martí. El xeneral Martínez foi depuestu por una fuelga xeneral en 1944, llamada "La fuelga de los Brazos Cayíos". Pero'l so gobiernu marcó l'entamu d'una serie de gobiernos militares autoritarios socesivos, que remataríen en 1979 con un golpe d'Estáu al Xeneral Carlos Humberto Romero, del PCN y la instauración de la Xunta Revolucionaria de Gobiernu. En 1982, escoyóse una Asamblea Constituyente, a la que la Xunta apurrió'l poder; darréu celebráronse en 1984 les primeres eleiciones presidenciales de la era democrática.

En 1969 prodúxose una curtia guerra con Hondures, que'l so nome formal ye "la guerra de la llexítima defensa",conocida tamién como "la Guerra de les 100 hores", o equivocadamente como "Guerra del Fútbol". La razón del conflictu anició nuna iniciativa de les autoridaes d'Hondures de llevar a cabu una reforma agraria dientro de les sos fronteres; dicha distribución de tierres favorecía solo a honduranos, lo cual obligó a miles de salvadorianos aniciaos n'Hondures a volver al so país, depués de ser espropiaos de les sos tierres. En respuesta a esta situación, El Salvador declaró la guerra a Hondures.

Guerra Civil

L'ambiente de violencia política que se viviera la década anterior contribuyó descomanadamente a la guerra civil que duraría 12 años (1980-1992). Foi un conflictu que militarmente definióse como una Guerra de Baxa Intensidá, o Guerra Popular Enllargada, como la denominaben les fuercies guerrilleres del FMLN y que costó la vida a más de 75.000 persones ente muertos y sumíos.

Dellos factores que contribuyeron a la guerra foron: la cayida internacional del preciu del café, los constantes fraudes eleutorales y el descontentu de la población pola forma de gobernar de los militares. Ente dellos sucesos qu'encendieron los ánimos mientres el conflictu armáu destaca l'asesinatu del arzobispu de San Salvador, Óscar Arnulfo Romero en 1980.

L'ambiente aturbolinao remató en 1992 cuando los combatientes del Frente Farabundo Martí pa la Lliberación Nacional (FMLN) formáu por cinco agrupaciones d'esquierda, y el gobiernu de derecha del entós presidente Alfredo Cristiani, d'Alianza Republicana Nacionalista (ARENA), roblaron los "Alcuerdos de Paz" el 16 de xineru de 1992 en Chapultepec, Méxicu, qu'aseguraron reformes polítiques y militares, pero nun afondaron nel aspeutu social.

Dómina de posguerra

En 1992, la Corte Internacional de Xusticia (CIJ) mandó el desllinde de "Los Bolsones" (una área fronteriza apostada ente El Salvador y Hondures), pero, gracies a la intervención de la Organización de los Estaos Americanos (OEA) y la CIJ en 2003, la total demarcación de la frontera terrestre foi rematada nel 2006. Tamién en 1992, la CIJ aconseyó una resolución tripartitu pa la creación de les fronteres marítimes nel Golfu de Fonseca. El Salvador sigue reclamando la Isla Coneyu, la cual nun s'inclúi na decisión de la CIJ nesti mesmu casu.

San Salvador, la capital, ye conocida polos munchos seísmos qu'asoceden; polo cual llamóse-y popularmente "Valle de les Hamaques" dende tiempos de la colonia. En 1986 un terremotu de 7,5 graos d'intensidá na escala Richter y de 10 segundos de duración, destruyó gran parte de la ciudá de San Salvador. El 13 de xineru de 2001, otru terremotu, ésti de 7,9 graos na escala Richter, causó gran destrucción a lo llargo y anchu del país. Una de les traxedies humanes qu'asocedió de resultes del seísmu, foi un argayu de tierra nel llamáu Cordal del Bálsamu na ciudá de Santa Tecla nel departamentu de La Libertad, que mató a más de 800 persones y dexó a dellos miles ensin llar. El 13 de febreru de 2001, un mes dempués, otru terremotu de semeyante magnitú mató a 255 persones, dexando ensin les sos cases a cientos de families, especialmente nel interior de la república onde viven les capes más probes de la sociedá.

Per otru llau, les últimes eleiciones presidenciales, celebraes el 15 de marzu de 2009, dieron como ganador al periodista Carlos Mauricio Funes Cartagena del partíu FMLN.

Política y gobiernu^[10]

Organización política

La Constitución de 1983, promulgada el 15 d'avientu d'esi añu define l'ordenamientu llegal básicu del país. Ellí establezse quE'l Salvador ye un estáu soberanu, y el so gobiernu una república democrática representativa. El poder executivu exércelu'l presidente, col sofitu del vicepresidente y los ministros y viceministros. El presidente de la República ye electu por votación direuta y permanez nel cargu 5 años. Nun puede ser reelixíu nel periodu siguiente, y ye, amás de presidente, comandante xeneral de les Fuercies Armaes.

El poder executivu ta nes manes de l'Asamblea Llexislativa d'El Salvador, un muérganu unicameral formáu por 84 diputaos elixíos cada trés años. No que cinca al poder xudicial, el so muérganu cimeru ye la Corte Suprema de Xusticia, formada por 15 maxistraos, de los que ún ye'l presidente de la Corte.

Colos Alcuerdos de Paz de Chapultepec (1992) creáronse la nueva Policía Nacional Civil, la Procuradoría pa la Defensa de los Derechos Humanos, y el Tribunal Supremu Eleutoral. Amás dióse-y vida llegal, como partíu políticu, a la oposición d'esquierda na forma del Frente Farabundo Martí pa la Lliberación Nacional (FMLN) y redefinióse el papel del exércitu, acutáu pa la defensa de la soberanía y la integridá territorial. Tamién se suprimieron dellos cuerpos de seguridá que taben al mandu del exércitu, como fueron la Guardia Nacional, la Policía de Facienda y los Batallones especiales formaos pa caltener la guerra contra la insurxencia de los años 80.

Gobiernu

El presidente del país ye, dende'l 1 de xunu de 2019, Nayib Bukele. El so vicepresidente ye Félix Ulloa, y el presidente de l'Asamblea Llexislativa ye Norman Quijano. El conseyu de ministros fórmenlu les persones que vienen darréu:

Rellaciones Esteriores: Alexandra Hill Tinoco.
Xusticia y Seguridá Pública: Rogelio Eduardo Rivas Polanco.
Gobernación: Mario Edgardo Durán Gavidia.
Facienda: Nelson Eduardo Fuentes Menjivar.
Economía: María Luisa Hayem Brevé.
Educación: Karla Evelyn Hananía Zablah.
Defensa Nacional: René Francis Merino Monroy.
Trabayu y Seguridá Social: Óscar Rolando Castro.
Agricultura y Ganadería: Pablo Salvador Anliker Infante.
Salú Pública y Asistencia Social: Ana del Carmen Orellana Bendek.
Obres Públiques: Edgar Romeo Rodríguez Herrera.
Cultura: Suecy Beverly Callejas Estrada.
Mediu Ambiente y Recursos Naturales: Fernando Andrés López Larreynaga.
Turismu: Morena Ileana Valdez Vigil.

Partíos políticos y sindicatos

Los principales partíos políticos del país son:

Frente Farabundo Martí de Lliberación Nacional (FMLN). El so coordinador xeneral ye Medardo González.
Alianza Republicana Nacionalista (ARENA). El so presidente ye Alfredo Cristiani
Partíu de la Esperanza (PE). Ye l'heriede del Partíu Demócrata Cristiano (PDC), disueltu pol Tribunal Supremu Eleutoral en 2011 por nun tener algamao el 3% de los votos nes eleiciones presidenciales de 2004. El so secretariu xeneral ye Rodolfo Parker.
Concertación Nacional (CN). Ye'l socesor del Partíu de Conciliación Nacional (PCN), disueltu pol TSE en 2011 poles mesmes razones que l'anterior. El so secretariu xeneral ye Ciro Cruz Cepeda.
Cambéu Democráticu (CD). El so secretariu xeneral ye Tomás Chévez.
Gran Alianza pola Unidá Nacional (GANA). El so presidente executivu ye José Andrés Rovira.

Ente la bayura de sindicatos del país destaquen, pola so implantación:

Federación Nacional Sindical de Trabayadores Salvadoreños (FENASTRAS). El so secretariu xeneral ye Juan José Huezo.
Sindicatu de Trabayadores del Institutu Salvadoreñu del Seguru Social (STISSS). La so secretaria xeneral ye Armida Estela Franco.
Sindicatu de Médicos Trabayadores del Institutu Salvadoreño del Seguru Social (SIMETRIS). El so secretariu xeneral ye Julio César Gallardo.
Asociación Xeneral d'Emplegaos Públicos y Municipales (AGEPYM). El so secretariu xeneral ye William Huezo.

Xeografía

Demografía^[11]

La población del país, según la proyeición pal 2010 de la Direición General de Estadística y Censos, ye de 6.200.000 habitantes. Los más d'ellos (94%) son mestizos, con un 5% d'amerindios y un 1% de blancos d'orixe européu.

Les mayores ciudaes del país, según la mentada proyeición, son: