Christopher Hewett (5 d'abril de 1922, Worthing – 3 d'agostu de 2001, Los Angeles) foi un actor y direutor teatral británicu, conocíu principalmente pol so papel de Lynn Belvedere na sitcom televisiva de l'ABC Mr. Belvedere.
Biografía
El so nome completu yera Christopher Michael Hewett, y nació en Worthing, Sussex (Inglaterra), siendo'l so padre un oficial del exércitu y la so madre una irlandesa descendiente de Daniel O'Connell.[3] Estudió nel Beaumont College, y a los siete años d'edá debutó n'escena nuna producción representada en Dublín de A Midsummer Night's Dream. A los 16 años, Hewett entró a formar parte de la Royal Air Force, dexándola en 1940. Hewett darréu entró na Oxford Repertory Company, debutando nel circuitu teatral del West End londinense en 1943.[4]
Darréu actuó nel circuitu de Broadway trabayando nos musicales My Fair Lady, The Unsinkable Molly, Music Is, y Kean, amás de la obra Sleuth, ente otres pieces, y dirixó en 1960 en Broadway la revista From A to Z y el musical de Richard Rodgers y Lorenz Hart representáu en 1967 Off Broadway By Jupiter. Hewett tamién dirixó otres pieces teatrales, ente elles The Marriage-Go-Round y Beyond the Fringe and Camelot.[5]
Hewett debutó nel cine col drama criminal de 1951 Pool of London, trabayando más palantre pa la televisión en Robert Montgomery Presents y DuPont Show of the Month. Ente les sos actuaciones cinematográfiques ye de reseñar el so papel del amuyeráu direutor teatral Roger DeBris na comedia de Mel Brooks de 1968 The Producers. En 1976 Hewett interpretó al burócrata Federov na sitcom Ivan the Terrible. Ente 1983 y 1984 foi Lawrence, el personaxe compinche del Mr. Roarke interpretáu por Ricardo Montalbán na temporada final de la serie de l'ABC Fantasy Island.
Al añu siguiente Hewett empezó'l que sería'l so papel más conocíu, el de Lynn Aloysius Belvedere, un mayordomu inglés que trabayaba nuna familia estauxunidense de clase media na sitcom Mr. Belvedere. En rematando la serie en 1990, Hewett actuó como convidáu nun episodiu de la producción de la NBC California Dreams. El so postreru trabayu ante les cámares foi en 1997, un caméu nel show de la FOX Ned & Stacey.[5]
Devotu católicu y solteru de tola vida, Hewett foi diáconu na Ilesia de St. Victor, en West Hollywood. Nos sos últimos años tuvo afeutáu pola artritis y la diabetes,[3] finando por entueyos de la postrera'l 3 d'agostu de 2001 en Los Angeles, California. Tenía 79 años d'edá. Nun dexó descendencia.
Filmografía
Ver tamién
Referencies
Enllaces esternos
