تحوتمس الاول ( حكم من حوالى 1525 ق.م - 1512 ق.م) ، ملك مصر من الاسره الفرعونيه التمنتاشر ، وسع الامبراطوريه المصريه فى النوبه ( السودان دلوقتى ) و اتوغل فى سوريا. تحوتمس الاول كان من ام مش ملكيه لكن قوى احقيته بعرش مصر عن طريق الجواز من بنت الفرعون اللى سبقه امنحوتب الاول ، من المعتقد قبل ما يتوج ، و من المحتمل انه كان لفتره ملك مشارك مع الفرعون اللى سبقه امنحوتب الاول.
فى تانى سنه من حكمه قاد حمله نيليه فى السودان و عدى الشلال الرابع و وسع حدود مصر فى الجنوب. مناجم الدهب كانت من اسباب توغله فى الجنوب و السبب التانى كان التهديدات لحدود مصر لمصر من عصر الاسره السبعتاشر من مملكة الكوشيين اللى كانت الموجوده جنب الشلال التالت .
بعد ما خلص من التوسع فى جنوب مصر خرج بالجيش المصرى على جهة الشرق و اتوغل فى سوريا لغاية الفرات لمطاردة بقايا الهكسوس و اعلن ان الفرات هو حدود مصر و ساب على ضفة نهر الفرات نصب.
جوه مصر تحوتمس الاول جدد معبد امون فى طيبه من الدوله الوسطى و عمل توسيع فيه و حط مسلتين قدام المدخل ، و كان اول ملك يبنى مقبره فى وادى الملوك فى طيبه و بنى قريه لعمال المدافن فى دير المدينه فى غرب طيبه. مش معروف بالظبط تحوتمس الاول حكم قد ايه. خلفه تحوتمس التانى.
.jpg)
