O rugby ye un esporte de contacto a on dos equipos luitan por a posesión d'una pilota, l'obchectivo ye fer mas puntuación que l'equipo contrario tot respectando as reglas d'o chuego. O partiu ye dividito en dos parts de 40 minutos con un descanso de 10, y as formas de fer puntuación son: acongeguir plantar a pilota en a zona de marca de l'equipo contario con una dos mans en contacte con ella, ixo ye considerato como un ensayo y tien un valor de cinco puntos, a mas de donar dreito a fer una patada a palos y si trescruza por medio d'éls (transformación), dos puntos mas. Tamién se puet sumar tres puntos fent una chutada a palos que trescruce por medio d'éls mediant un golpe de castigo en una chugada aturata por l'arbitre y por una chutada de sobrebote (drop) en quialsiquier momento con o chuego en movimiento .

Ye un esporte que tien un orichen común con o fútbol en Anglaterra a meyatos d'o sieglo XIX, por iste inte o rugby bi ha estato confrontato con él, chuego limpio en cuentas de chuego sucio, fuerza en cuentas d'habilidat, o respecte d'as reglas de chuego, por l'arbitro y d'o publico ta os arbitros, equipo y afición rival. Tamién ye caracteristico y diferencial d'o fútbol fer o tercer tiempo, que ye una reunió feita una vegata terminato o partiu entre os dos equipos, os entrenadors, arbitros y part del publico a on se comparte un refricherio (en os seniors cheneralment muita cerveza) y bella coseta ta picar. Isto fa empatizar con l'equipo contrario y suavizar as confrontacions feitas mientres o partiu y aprender a controlar os sentimientos que surten d'una confrontación fisica y valorar l'esfuerzo feito por o contrincante.

Ye muit popular en as Islas Britanicas y en atros países anglosaxons, mas que mas en as antigas colonias britanicas d'Australia, Nueva Zelanda y Sudafrica, asinas como en Francia y en Italia. Tamién se practica, encara que con menos importancia, en atros países d'o continent europeu, como Portugal, Espanya y países de l'este europeu, como Rumanía, Cheorchia u Rusia. En America se practica mas que mas en Archentina y atros países como Canadá, Estaus Unius, Uruguai, Chile, Brasil, Paraguai y menos en Venezuela, Colombia y Perú. En Africa ye popular en Sudafrica y por a suya influencia en Namibia y Zimbabwe, por influencia francesa en Tunicia, Costa de Vori, Madagascar, y Marruecos. Por influencia australiana y neocelandesa, o rugby ye tamién un esporte popular en bella isla d'o Pacifico como Fichi, Tonga y Samoa que con una población de poco mas d'un millón d'habitants entre as tres son compiten a sobén en o Campionato d'o Mundo de Rugby. En Asia, l'equipo mas destacato ye Chapón.

Bi ha diferents varians d'o chuego con diferent numero de chugadors por equipo como prencipal diferencia. O mas conoixito y practicato en tot o mundo ye o Rugby Union o Rugby a 15, tamién bi ha o Rugby League u Rugby a 13 practicato prencipalment en Yorkshire, Nord-oeste d'Anglaterra y bels lugars de'Australia y Nueva Zelanda y finalment o Rugby a 7 que zaguerament tien una gran popularidat y cada vegata ye mes practicato. Ista zaguera variant ye esporte olimpico dende os Chuegos Olimpicos de Río 2016.

L'equipo de rugby mas important d'Aragón ye actualment o Fénix Club de Rugby Zaragoza.

• (es) Federación Espanyola de Rugby.
• (es) Federación Aragonesa de Rugby.