Die Wêreldtoetskampioenskap 2023–2025 (Engels: 2023–2025 ICC World Test Championship) word van 16 Junie 2023 tot Junie 2025 beslis. Dit is die derde Wêreldtoetskampioenskap in toetskrieket wat deur die Internasionale Krieketraad (IKR) aangebied word. Dit het op 16 Junie 2023 begin met die eerste toets in die As-reeks en sal eindig in Junie 2025 met die eindstryd op Lord’s, Londen, Engeland.[1]
Die Wêreldtoetskampioenskap 2023–2025 se eindstryd sal op Lord’s in Londen beslis word
Aan die Wêreldtoetskampioenskap 2023–2025 neem nege van die huidige twaalf toetslande deel, waarvan elke span ’n toetsreeks teen ses van die ander agt ander spanne speel. Elke reeks behels tussen twee en vyf wedstryde, dus speel elke span ses reekse (elk drie tuis en weg); daar word egter nie met dieselfde aantal toetswedstryde vir elke span beplan nie. Elke span kan tydens elke reeks ’n maksimum 120 wedstrydpunte insamel en die twee spanne met die meeste wedstrydpunte ontmoet in die eindstryd.[2] In die geval van ’n gelykop of onbesliste eindstryd sal albei spanne die trofee deel.
Van die toetsreekse in die Wêreldtoetskampioenskap is deel van langer aaneenlopende reekse, soos die As-reeks 2023. Van die nege deelnemende spanne sal ook bykomende toetswedstryde in die tydperk speel, wat nie deel is van die Wêreldtoetskampioenskap nie, maar wel van die IKR se Toekomstige Toerprogram vir 2024–2031, veral om toetswedstryde aan die drie toetslande te besorg wat nie aan die Wêreldtoetskampioenskap 2023–2025 deelneem nie.[3]
