PROFILPELAJAR.COM

Potchefstroomse Universiteitskoor
	Logo van die Potchefstroomse Universiteitekoor
Agtergrondinligting
Ook bekend as	Potchefstroom University Choir
Oorsprong	Potchefstroom, Suid-Afrika
Jare aktief	1955
Gewese lede	Kobie van Rensburg

Die Potchefstroomse Universiteitskoor (Engels: Potchefstroom University Choir) is gesetel op die Potchefstroomkampus van die Noordwes-Universiteit.

Die Potchefstroomse Universiteitskoor is in 1955 gestig o.l.v. prof. Pieter de Villiers. Die koor was van 1976 tot 2011 onder leiding van prof. Awie van Wyk, wat ’n bekroonde Suid-Afrikaanse komponis en dirigent is. Sedert 2012 staan die koor onder leiding van Kobus Venter. Die koor onderneem jaarliks een binnelandse toer (dit sluit Namibië in) en een keer elke vyf jaar ’n oorsese toer. Die koor het reeds agt oorsese toere beleef, in 1981, 1987, 1993, 1997, 2003, 2008, 2011 en 2014. Die oorhoofse doel van die toere is om kulturele bande te bou met die buiteland en om Suid-Afrikaanse koormusiek daar blootstelling te gee.

Die koor bestaan uit gemengde stemme en die lede is almal bona fide studente van die Noordwes-Universiteit se Potchefstroomkampus. Die ouderdomme van die lede wissel dus van 18 tot 23 en studeer ’n verskeidenheid rigtings van ingenieurswese tot onderwys. Die koor ontvang gereeld uitnodigings van staatsinstellings, korporatiewe organisasies, ander universiteite, kerke en kulturele organisasies van dwarsoor die land vir optredes. Die koor het onder meer opgetree by die inhuldiging van mnr. F.W. de Klerk en mnr. Nelson Mandela. Die koor is genooi deur die Internasionale Sentrum vir Koormusiek (in België) om die jaarlikse gaskoor te wees in 2003, en het reeds twee keer aan die Internationaler Chorwettbewerb in Spittal an der Drau in Oostenryk deelgeneem.

Van die groot werke wat die koor, onder orkesbegeleiding, opgevoer het sluit in Carmina Burana (van Orff), Requiem (van Mozart), St. Mattheus Passie (van Bach), Messiah (van Händel), Kroningsmis (Coronation Mass) (van Mozart), Petite Messe Solennelle (van Rossini), Requiem (van Fauré), Requiem (van Brahms), Requiem (van Watt), Misa Criolla en Navidad Nuestra (van Ramírez), Missa Choralis (van Liszt) en Mother and Child (van Tavener).

Verskeie klank- en televisieopnames is al deur die koor gedoen en dit word gereeld gebruik, veral op RSG en Classic FM. Die koor het reeds ses laserskrywe vrygestel.

Unieke koorklank

Hierdie koor, onder leiding van prof. Awie van Wyk, is dwarsoor die wêreld bekend as ’n koor wat nie net musiek uitvoer nie, maar wat die harte van die gehoor deur die musiek raak. Van Wyk het ’n unieke manier waarmee hy die beste uit die lede van hierdie koor haal. Omdat hy self die musiek so intens ervaar wanneer hy dirigeer, voel die koor hom oombliklik aan en word dit wat hy op die koor projekteer netso weerspieël op die gehoor. Die ervaring van die musiek is vir prof. Van Wyk baie belangriker as die letterlike nakoming van die bladmusiek self, hoewel hy baie noukeurig te werk gaan om die detail van die musiek in oefentyd in te oefen.

Die Potchefstroomse Universiteitskoor het ook al vele sangers vir die Wêreldjeugkoor opgelewer en sluit onder andere Mabet van Wyk, Richter Grimbeeck (tans ’n koorleier aan die Oosrand van Johannesburg), Lhente-Marie Pitout, Jacques Imbraillo, Kobie van Rensburg en Jacques le Roux in.

Van prof. Van Wyk se bekendste komposisies sluit in die kinderoperette, Gelukland, Ps. 16 (Neem my in beskerming, O God) en die toonsetting van die Griekwapsalms, uit ’n digbundel genaamd "Innie skylte vannie Jirre" deur Hans du Plessis. Behalwe vir die komposisies, is Van Wyk ook ’n befaamde skilder.