Ivy Matsepe-Casaburri (18 September 1937 – 6 April 2009) was 'n Suid-Afrikaanse politikus. Sy was die land se minister van kommunikasie vanaf 1999 tot haar dood in 2009.

Matsepe-Casaburri is in Kroonstad in die destydse Oranje-Vrystaat-provinsie gebore en voltooi haar skoolloopbaan in die Natal-provinsie. Sy het daarna haar BA-graad by die Universiteit van Fort Hare verkry voor die aanvaarding van 'n onderwyspos in Natal.

Kort daarna het Matsepe-Casaburri in ballingskap gegaan; sy het tyd spandeer in Swaziland, Zambië, die Verenigde State van Amerika en Namibië voordat sy na Suid-Afrika terugkeer het in 1990. Terwyl sy in die Verenigde State van Amerika geleef het, het sy haar Ph.D. in sosiologie van die Rutgers Universiteit ontvang.

In 1993 is Matsepe-Casaburri aangestel as voorsitter van die Suid-Afrikaanse Uitsaaikorporasie. Sy was die eerste vrou en die eerste swart persoon wat hierdie pos beklee het. In 1997 het sy bedank uit hierdie amp om Mosiuoa Lekota as premier van die Vrystaat op te volg. Sy was ook die eerste vrou wat die posisie van 'n premier in Suid-Afrika beklee het.

Matsepe-Casaburri is in Junie 1999 as minister van kommunikasie aangestel.

Sy het ook kortliks gedien as Suid-Afrika se waarnemende president in 2005^[1] en in 2008 tussen die bedanking van Thabo Mbeki en die oorname van die amp deur Kgalema Motlanthe.^[2][3]

• (en) Matsepe-Casaburri sterf in hospitaal – Obituary

Hierdie artikel omtrent ’n Suid-Afrikaanse politikus is ’n saadjie. Jy kan Wikipedia help deur dit uit te brei.