Die bergluisie (Leucospermum vestitum) is 'n blomdraende struik wat tot die genus van speldekussings behoort en is endemies aan die Wes-Kaap waar dit deel van die fynbos-bioom is. Die spesie is versprei vanaf die Sederberg tot die Olifantsrivier, Koue Bokkeveld, Hexrivierberge, Groot-Winterhoekberge en die Breederiviervallei naby Worcester. Dit het voorheen ook op Leeukop op die Kaapse Skiereiland en die Paarlberg voorgekom, maar is nou uitgesterf in hierdie gebiede en sedert 1886 nie weer hier gesien nie.
Die plant groei regop maar kan ook uitsprei en word 1 tot 2,5 m hoog. Dit blom van Julie tot Januarie met die hoogtepunt van Oktober tot November.
Die plant vrek nadat dit gebrand het maar die sade oorleef. Die saad word twee maande nadat die plant geblom het vrygestel. Sade word deur miere versprei wat dit na hulle neste dra. Die plant is eenslagtig. Bestuiwing vind deur voëls plaas. Die plant groei op rotsagtige sandsteenhellings op hoogtes van 60 - 1 350 m
In Engels staan die plant as die Silky-haired pincushion bekend.
Galery
Sien ook
Bronnelys
