Ang Atenas (Griyego: Αθήνα, Athína) ay ang kabisera at pinakamalaking lungsod ng Gresya. Matatagpuan ito sa rehiyon ng Attica. Isa ang Atenas sa mga pinakamatandang lungsod sa buong mundo, na may naitalang kasaysayan sa loob ng humigit 3,000 taon. Ipinangalan ang lungsod sa dati nitong patron na si Atena noong kapanahunan ng Matandang Atenas.
Sa kasalukuyan, may populasyon ng 745,514 noong 2001 ang lungsod ng Atenas,[2] at 3.37 milyong katao sa kalakhan nito.[3] Bilang isang bantog at kosmopolitano na lungsod, ang Atenas ay nagiging sentral sa buhay pang-ekonomiya, pampananalapi, pang-industriya, pampolitika at kultural sa Gresya. Mabilis rin itong maging isang sentro ng negosyo sa Unyong Europeo.
Ang Atenas ay ang lugar na ginanapan ng pinakaunang Modernong Palarong Olimpiko noong 1896 at ang lungsod ay muling ginanapan sa ikalawang pagkakataon noong Palarong Olimpiko sa Tag-init ng 2004.
Noong unang panahon, isang malakas na lungsod-estado at bantog na sentro ng sining, kultura, edukasyon at lalo na sa pilosopiya ang Atenas. Bilang luklukan ng Akademiya ni Platon at ng Liseo ni Aristoteles,[4][5] naging lugar ng kapanganakan ang Atenas nina Socrates, Pericles, Sophocles at ibang mga importante at maka-impluwensiyang mga pilosopo, manunulat at politiko ng matandang daigdig. Kilala rin ang lungsod bilang duyan ng sibilisasyong Kanluranin at ng demokrasya[6][7] dahil sa impakto ng mga inambag nitong ideya at gawaing kultural at pampolitika noong ikalima at ika-apat na siglo BC sa ibang mga bahagi ng noong-kilalang kontinente ng Europa.[8]
↑Athens aricle from Encyclopaedia Britannica Quote: Ancient Greek Athenai, historic city and capital of Greece. Many of classical civilization's intellectual and artistic ideas originated there, and the city is generally considered to be the birthplace of Western civilization.
