Sint Maarten ta un pais den Reino Hulandes; Saba i Sint Eustatius komo entidat públiko a bira desde oktober 2010 un munisipio spesial di Hulanda. E lenguahe diario na e tres isla ta ingles. Kompara ku e demas islanan karibense denter di Reino Hulandes, e Islanan ABC of islanan abou, unda e lingua franca ta Papiamentu.
Teritorio Insular
Entre 1951 i 1983 Islariba tabata forma ofisialmente e "Teritorio Insular Islariba", un unidat atministrativo denter di e konstelashon antiano. Sint Maarten tabata e sede di e gezaghebber di e teritorio insular, kende tabata wòrdu representá na Saba i Sint Eustatius pa dos atministradó. E teritorio insular tabatin un konseho insular ku diessinku miembro, di kual seis tambe tabata fungi komo diputado.
E teritorio insular i su organonan, esta e konseho insular i e kolegio ehekutivo, tabata supdividí den tres sekshon ku un grado alto di outonomia. Den praktika esey tabata enserá ku kada isla en realidat tabatin su propio konseho insular di sinku miembro (ku dos diputado). Komo ehempel tabata referi na e "konseho insular di Islariba, sekshon Saba".
Pa medio di un kambio den e Areglo Insular Antias Hulandes (ERNA), e teritorio insular a ser parti den tres teritorio insular separá desde promé di aprel1983.