Østre Porsgrunn kyrkje er ei kyrkje i Porsgrunn kommune i Telemark. Kyrkja erstatta ei kyrkje frå 1760 som vart tend på og brann ned til grunnen natt til 11. april 2011.
Bakgrunn
Det var ulike oppfatningar i Porsgrunn om kyrkja burde byggjast opp som ein kopi av gamlekyrkja eller som ei moderne kyrkje ut frå behov og funksjonar.[1][2] Det gjekk ein aksjon over fleire år for å få oppført ein rekonstruksjon av kyrkja som brann,[3] men mellom aktive medlemmar i kyrkjelyden ønska dei fleste ei moderne kyrkje.[4] Dette vart òg vedteke av Porsgrunn kyrkjelege fellesråd, som hadde ansvar for bygging av ny kyrkje.
Kyrkjebygg
Den nye kyrkja vart teikna av arkitekt Espen Surnevik og Trodahl arkitekter. Bygget vert gjerne omtala som «porselenskyrkja», ettersom ho skulle kles utvendig med fliser som skulle minne om porselen.[5] Tor Entreprenør vart tildelt byggjeoppdraget,[6] og arbeidet byrja i desember 2017. Det nye kyrkjebygget stod ferdig hausten 2019 og vart innvigd den 15. september 2019.[7]
