Friidrettsøvingane under Sommar-OL 1988 i Seoul vart avvikla i tida 23. september til 2. oktober 1988. Det vart tevla i 42 øvingar, 24 for menn og 18 for kvinner. 1627 utøvarar frå 148 land deltok i tevlingane, 1148 menn og 579 kvinner. Tevlingane fann stad på og ved olympiastadion i Seoul, ein arena som stod ferdig i 1984 med plass til 70 000 tilskodarar.
Carl Lewis frå USA sette ny verdsrekord på 100 meter med tida 9,92 sekundar. På kvinnesida forbetra dei USA-amerikanske svigerinnene Florence Griffith-Joyner og Jackie Joyner-Kersee kvar sin verdsrekord, fyrstnemnde på 200 meter og sistnemnde i sjukamp. Begge desse rekordane, høvesvis 21,34 sekundar og 7 291 poeng har vorte ståande til dags dato (2015). Til sist susa Sovjetunionen sitt lag i 4 x 400 meter stafett, beståande av Tatjana Ledovskaja, Olga Nazarova, Marija Pinigina og Olga Bryzjina, inn til OL-gull på tida 3.15,17, også det ein gjeldande verdsrekord i 2015.
