Direct er eit studioalbum frå 1988 av den greske musikaren Vangelis. Vangelis flytta til eit nytt plateselskap, Arista og introduserte ei ny retning i musikken til Vangelis mot eit meir popformat. Etter Mask (1985) og Invisible Connections (1985) var det ein kort pause i arbeidet til Vangelis, då han flytta frå London til Hellas, og var involvert i teaterarbeid.
I plateomslaget står det at Vangelis kalla albumet «Direct» for å syne korleis han komponerte musikk. Innspelingsprosessen gjekk føre seg slik at så mykje som mogeleg vart spelt inn samstundes, med få lydopptak oppå kvarandre. Denne prosessen vart i stor grad utført ved hjelp av eit spesiallaga midisystem designa for Vangelis av teknikarane Bill Marshall og Pete Kellock, i tillegg til den kommersielt tilgjengelege Zyklus MPS som òg var utvikla av Marshall og Kellock.[2]
Albumet er nesten heilt instrumentalt, og det vert hovudsakleg nytta synthesizerar og trommemaskinar. Operavokalen på «Glorianna» vert sungen av den greske mezzo-sopranen Markella Hatziano. Den mannlege stemma på «Intergalactic Radio Station» er teknikaren Casey Young.
Albumet vart gjeve ut både på LP og CD, men to songar, «Dial Out» og «Intergalactic Radio Station», finst ikkje på LP-utgåva.
