Christian Holberg Gran Olsen (13. mars 1835–5. mars 1921) var ein norsk instrumentmakar og oppfinnar, kalla «Kikkert-Olsen». Han vart utdanna i Bergen og Hamburg og opna eigen verkstad i Oslo i 1861. Han vann snart internasjonalt ry, og konstruerte mellom anna eit telegrafapparat som vart løna med gullmedalje både ved verdsutstillinga i Paris 1878 og den internasjonale elektriske utstillinga same stad i 1881. Han bygde i 1885 den største astronomiske kikkerten i Norden, og oppretta eit stjerneobservatorium for publikum i Slottsparken i Kristiania, «Kikkertpaviljongen», som var det første folkeobservatoriet i Europa.

• 
  Typetrykkstelegraf laga av Chr. H. G. Olsen 1877. Trass i utanlandske utmerkingar vart apparatet ikkje teke i bruk ved norske telegrafstasjonar. Foto frå Norsk Teknisk Museum i Oslo.

  Foto: 2013
• 
  Slottet og Slottsparken i Oslo fotografert frå luftballong 1906. På Nisseberget framme til høgre i biletet står folkeobservatoriet til «Kikkert-Olsen». Paviljongen vart reist på Abelhaugen^[1] på andre sida av vegen 1886,^[2] flytta til Nisseberget 1894 og riven 1909. Kikkerten vart set opp på Holmenkollen i 1911.

  Foto: Fredrik Blom-Olsen/Mittet & Co./Nasjonalbiblioteket
• 
  Kikkerten i folkeobservatoriet i Slottsparken vart flytta til ei bygning i Holmenkollen i 1911. Observatoriet var ope til ut i 1920-åra.^[3]

  Foto: Fredrik Blom-Olsen/Nasjonalbiblioteket

1. ↑ Om «Observatoriet på Abelhaugen» i Astronomen og universet : praktisk innføring i astronomi (1981) side 8–9
2. ↑ Om «Folkeobservatoriet i Kristiania Slotspark» i Fixstjerner og Stjernebilleder : en populær-astronomisk Skildring (1895) side 13 og 272
3. ↑ Om Chr. H. G. Olsen i Oslo-optikk gjennom femti år : Oslo optiske instrumentmakerlaug. 1911-1961 side 19–21