Julien Alex Thomas Faubert (twieled fl-1 ta' Awwissu 1983) hu eks-plejer tal-futbol Franċiż.
Karriera
Faubert beda l-karriera mat-tim ta' Cannes, qabel ma fl-2004 itrasferixxa mat-tim ta' Bordeaux.
Fl-1 ta' Lulju 2007, minkejja xniegħat li Faubert kien qrib li jitrasferixxi mat-tim ta' Rangers, hu minflok ingħaqad mat-tim Ingliż ta' West Ham United għal somma ta' madwar £6.1 miljun.[1] Però, il-karriera mal-West Ham ma tantx bdiet fuq nota pożittiva hekk kif weġġa' fil-logħba ta' ħbiberija ta' qabel l-istaġun kontra Sigma Olomouc, u kien mistenni li jdum sitt xhur barra mil-logħob. Id-debutt mal-ewwel tim wasal fit-12 ta' Jannar 2008, meta daħal bħala sostitut fil-partita kontra Fulham f'Upton Park. L-ewwel staġun qalb il-futbol Ingliż xejn ma kien feliċi meta irnexxielu jagħmel biss tmien apparenzi minħabba li kontinwament kien iweġġa.
Faubert ingħata l-permess li jinnegozja mat-tim ta' Real Madrid, bi ħsieb li jiġi msellef għall-kumplament tal-istaġun għal somma ta' €1.5 miljun b'għażla li Real jixtruh b'mod permanenti għal €6 miljun.[2] It-trasferiment tiegħu sar fil-31 ta' Jannar 2009,[3] waqt li d-debutt tiegħu bil-flokk Madrilen wasal fis-7 ta' Frar, kontra Racing Santander.[4]
Karriera internazzjonali
L-unika apparenza ta' Faubert mat-tim nazzjonali Franċiż waslet fis-16 ta' Awwissu 2006, kontra il-Bożnija u Ħerżegovina. Id-debutt immarkah b'gowl fl-aħħar minuta biex assigura rebħa għal Franza bl-iskor ta' 2–1.
Referenzi
Ħoloq esterni
