Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.

'n Saos, van 't Fraanse sauce, „breuj“ oet 't Latiense salsa, „gezaote breuj“ is 'ne vloeibaar bies romig geboonde biegerech bie versjillende werm en kow gerechte, salades en desserts.

Bie de Gans op de wies va Visé wert 'n knoflook-roomsaos gaeëte.

Ingrediaente:

• 4 à 6 tieëne knoflook
• 150 g bótter
• 3 èèjdäöere
• 200 g room
• paeëper en zaot

Kwètsj de sjöngemakde knoflooktieëne in e penneke en doeg dao op gaans klèè vuur bietsje bie bietsje de gesjmoolte bótter bie. En daonao de lósgeklópde èèjdäöere. Reur good mèt 'ne hóte laeëpel bies 'n fieng saos oontsjtèèt. Doeg da oonder good reure d'r room d'r bie. Brèng de saos óp sjmaak mèt paeëper en zaot en haow ze waerm (evt. au bain-marie).

Mayonaise is 'n kow saos die traditioneel gaeëte wert bie friete. Mayonaise wert ooch gebroekt es basis väör cocktails en väör 't aa-make va sjlaat.

Alle ingrediaente motte 'n kamertemperatuur ha. Zeunt ze te kaod of te waerm da gèèt dich de mayonaise um of in nuujer Plat oetgedrökt: da geet ze sjifte. Bie 't däörèè-reure van de ingrediaente mèt 'ne klöpper maog me allèng reure, geliekmaotèg en röstèg reure. En dus nèèt kloppe want da gèèt de mayonaise ooch um en kans-te va väörofaa beginne.

Ingrediaente:

• 1 vaeërsje èèj-däöjer
• paeëper oet mäöle
• get zieëzaotkorrels
• 1 theelaeëpel fienge mosterd
• 15 aeëtlaeëpele sjlaa-aoëlie, maïs-aoëlie of andere
• 2-3 aeëtlaeëpele aedsje
• sap van 'n haof citroeën

Reur d'r däöjer in 'ne koomp mèt d'r paeëper, 't zaot, d'r mosterd, 'ne haove aeëtlaeëpel aoëlie en ene theelaeëpel aedsje röstèg däörèè bies 't zich good gemengd haat.

Doeg dan, oonder geliekmaotèg reure, dröppelsgewies, get aoëlie d'r bie en reur bies dat dae gaans opgenaome is. Es me al 'ns mayonaise haat zieë make da wèt me op wat v'r momaent das-te d'r aoëlie in 'n dun sjträölsje kins laote lope. Is dat neet 't gavel da begin mèt dat lètste, gaans langsem-aa es-te e bäömke van zoe'n twieë cm mayonaise in d'r koomp haas. Wert de mayonaise te diek, doeg da wer 'ne theelaeëpel aedsje d'r bie. Es alle ingrediaente op en de mayonaise vaeërdèg is, preuf da of d'r nog get zaot of paeëper bie mot. Da kan-ste nao sjmaak en langsem-aa 't sap van 'n haof citroen d'r dör reure.

Is de mayonaise umgegange is da mos-te opnuuj beginne. Dus 'ne nuuje däöjer mèt paeëper, zaot, mosterd, get aoëlie en e bietsje aedsje däörèè reure en da dröppelsgewies de umgegange mayonaise d'r bie doeë. Es de mayonaise zich good gepakt haat, kans-te sjtil-aa get mieë tegeliekertied d'r bie doeë.

Me kan mayonaise ooch mèt 'ne mixer make, mae dat haat, ooch al gebroekt me dezelde ingrediaente, 'ne invloed op d'r sjmaak.

Me kan de mayonaise pikaanter make dör 'ne aeëtlaepel mosterd of get extra paeëper mèt eenkel dröppele worcestersaos of tobasco d'r bie te doeë.

Es 'n regeringscoalitie nao laestig oonderhandele töt sjtaand is brach, zaet me dat de mayonaise zich pakt ofwaal 't peunt van beending zjuus översjraeje haat en dus gèèt gelökke.