Puṇe[1] sive scriptura devanagari पुणे (Anglice olim Poona[2], in lingua Latina "Poona"[3]) est urbs civitatis Mahārāṣṭrae secunda, Indiae omnis nona quo ad numerum habitantium pertinet, incolis 3 124 458 anno 2011. Hoc loco iam urbs vel oppidum saeculo IX crevisse censetur. Haud longe distabat templum rupestre deo Sivae sacratum, nomine Pataleśvara, saeculo VIII excavatum, quod hodie intra limites metropolitanas stat. Saeculo XVIII Pune urbs capitalis facta est imperii Marāṭhārum, sed saeculo XIX magnum exercitús Societatis Indiae Orientalis et regiminis Britannicae castrum militare saeculoque XX sedes dioecesis meridianae exercitús olim Britannici, denuo Indici liberi.
Templum Devadeveśvara Hinduicum urbis ipsius antiquissimum, anno 1749 confectum, summo monte Parvatī(mr) stat, deis Sivae et coniugi Pārvatī(en) sacratum. Templum Caturśrungī(en), novellae deae Caturśrungī sacrum, saeculo fortasse XVII conditum sed recentius restructum, locus est peregrinationis quibus diebus feriae Navaratri celebrantur. Templum Dagadūśeṭha Haḷavāī(mr), anno 1893 e munificentia dulciarii illius nominis ad honorem dei Ganeśae constructum, quotannis ad ferias huius dei celebrandas frequentatur.
Urbi Pune clima est semiaridum calidum per enumerationem Köppen–Geiger, in stationes tres divisum, videlicet aestatem a mense Februario, hippalum ab Iunio, hiemem a Novembri; temperatura aëris media mense Maio 30°, Decembri 20°, a mense Iunio ad Septembrem hippalo regente 25°, temperatura minima inter 11° et 23°, maxima inter 27° et 38°; pluviis mense Ianuario nullis, mense solo Septembri ad 187 mm, toto anno ad 722 mm elevatis; diebus pluviosis per annum totum fere 50 accidentibus; humiditate relativa inter mensuras 36% (mensibus Martio et Aprili) et 82% (mense Augusto) reperta.[4]
