Franciscus Xaverius Séda (lair ing Flores, Nusa Tenggara Wétan, 4 Oktober 1926 – pati ing Jakarta, 31 Dhésèmber 2009 ing umur 83 taun) inggih punika salah satunggalipun pulitikus, mantri, tokoh gréja, pengamat pulitik, lan pengusaha Indonésia.[1][2][3] Sasampunipun tamat SD ing Flores 1940, panjenenganipun tindak dhateng Munthilan, Jawa Tengah.[1] Sinambi sekolah ing SMP, panjenenganipun nyambut damel dados tukang suket, tukang ngadhuk panganan, lan pamerah susu ing satunggalipun paternakan ing èrèng-èrèngipun redi Merapi.[1] Panjenenganipun ugi naté dados loper susu lan tukang tagih rékening.[1]
Lulusan saking Katholieke Economische Hogeschool ing Tilburg, Walanda, punika ijrah dhateng Jakarta kanggé nyambut damel wiraswasta.[1] Salajengipun Frans Séda aktif ing pulitik minangka Ketua Umum DPP Parté Katulik ngantos dados anggota MPRS lan DPR-GR.[1] Wonten ing papréntahan, Frans Séda naté njabat dados Mantri Perkebunan wonten ing Kabinèt Kerja IV (1963-1964), Mantri Kauangan Kabinèt Ampera I lan II (1966-1968), sarta Mantri Perhubungan lan Pariwisata Kabinèt Pembangunan I (1968-1973).[1]
Sasampunipun boten njabat dados mantri, Frans Séda njabat dados utusan ageng Indonésia ing Brussel, kanggé Bèlgi lan Luxembourg lan ngrangkep dados kepala pawakilan Indonésia kanggé Masarakat Ékonomi Éropah (MEE).[1] Sasampunipun kondur dhateng Indonésia, panjenenganipun dados anggota Dhéwan Pertimbangan Agung (DPA) wiwit taun 1976.[1]
Cathetan suku
Pranala njawi
Frans Seda Archived 2012-06-04 at the Wayback Machine.
