Tanzania esas richa en naturala resursi, e la sektoro di turismo kreskabas rapide dum recenta yari. De 2010 til 2019, lua ekonomio kreskis mezavalore 6,3% omnayare, havanta un ek la maxim granda ekonomiala kreski de Afrika, ed un ek la maxim rapida de la mondo^[3], tamen, pos kreskir 7,9% en 2011, la rapideso di la kresko diminutis dum la sequanta yari.^[3]

Quale la maxim multa landi de la mondo, en 2020 lua ekonomio afektesis serioze da pandemio di KOVID-19. Ye la 7ma di septembro 2021, IMF aprobis urjanta financala suporto di US$ 567,25 milioni por suportar l'esforci pri kombato a la pandemio en la lando e kovrar kusti di atendi urjantala e humanala. Pos la pandemio, sektori di gastigo di turisti, produktado di elektro, minado e transporti rekuperis su rapide^[1].

Agrokultivo - nome kafeo, teo e kotono - reprezentas cirkume 1/4 de la TNP, ed employas plu kam 60% de la laboro-povo.^[1] Cirkume 16,4% de la tereni esas kultivebla.^[4] Tamen, pro la forta dependo de agrokultivo, l'ekonomio di la lando esas multe vundebla a klimatala problemi ed a la vario dil internaciona preci di lua produkturi. La manko di konoco dil agrokultivisti, sikesi, inundadi o la vario di temperaturi povas domajar la vivo-stando ed augmentar chomeso, hungro e desnutrado.